[mr_astra]

الف مبروك عليك المحل
وخلى بالك البايرة ترجع بيت ابوها
اى قطعة فيها عيب صناعة ترجع للتاجر
انا غيرت او رجعت ديسك جديد لصاحب المحل وهو ادامى اداة للمستورد وادانى فلوسى
وبالوقت هاتقدر تعرف شغل فلان من علان والكويس والوحش والغالى والرخيص
وحاول تبضع من التوفيقية بتاخد سعر الجملة

وشوية شوية هاتنزل عند ناس معينة بالاسم تجيب منهم الحاجات اللى انت محتاجها ومها اقنعك بنوع تانى هاتفضل عند رايك لانك مجربها
وجب على تاجر الجملة انة يطلعك اول باول بالسعر بالتليفون او انت اللى تحدث اسعارك كل اسبوع بالتليفون حتى
وتشوف قطع الغيار اللى عليها اقبال واستهلاك وتحاول توفر كمية مناسبة منها
زى مثلا تيل الفرامل والسيور وكاوتش المية والجوانات
وبعد حوالى سنة ممكن تنزلك بضاعة بالاجل وتبقى انت كومسيون بس لتاجر الجملة
المهم فى الموضوع ان ميكنش عندك مسمار ناقص كل حاجة تبقى موجودة وصدقنى هايجلها زبونها
اوعى حد يجى يسالك على حاجة وتقولة معنديش لازم يكون عندك ولو اعداد بسيطة من كل حاجة
لان الزبون لو راح جاب من برة مش هايجلك تانى
واعمل دعاية لنفسك على نطاق الميكانيكية والعفشجية وتعرفهم بنفسك
وما يمنعش من هدايا متواضعة لميكانيكى او عفشجى كل فترة تحفيزا له انة يبتعلك الزبون ومش عيب ولا حاجة
وحاول تجيب من الصنف الواحد اكتر من نوع صينى مثلا وايطالى وتركى عشان الزبون هايشترى يعنى هايشترى من عندك
ولازم يكون عندك لباقة فى اقناع الزبون بقطعة الغيار ودى اكيد هاتيجى من المممارسة وخببرتك فى السوق
خلى بالك الزبون لما بيروح يشترى من محل ما بيفرقش معاة السعر على اد ما بيفرق ان الحاجة تكون كويسة وان اللى بيبعها يحسسة ان المحل دة بتاعة
ومتقلش لحد عاوز يغير حاجة لا
تكشف عليها لو فى علبتها ومحصلهاش حاجة اية المانع انك ترجعها
قطع الغيار الكهرباء هى اللى مش بتترجع