المشاركة الأصلية كتبت بواسطة mummy_47
¬¬اولا : تجربتي مع شراء اول سيارة مجهزة(فيات تمبرا مو 1990) اشتريتها عام 2004 بحوالي 23000 الف تقريبا ةخليني اقولكم على الخطوات العقيمة اللي كانت موجودة ساعتها :
1-تروح على الوفاء والامل تاخذ ورة من عندهم تثبت حالتك(مش عارف ليه)
2- تعمل كشف حالة اجتماعية في الشؤن الاجتماعية اللي تابع لها منطقة سكنك عشان تثبت انك قادر تصرف على العربية ووالدك عنده املاك عشان يقدروا يحجزوا عليها لما تتهبل في دماغك وتتصرف في العربية قبل 5 سنين من غير ما تندفع الجمارك.
3-طبعا مش كفابة اللي فات ...لازم تعمل حاجة اسمها (تحريات النيابة) ...لازم تثبت ان عندك دخل اكثر من 500 ج شهريا وانك تقدر تصرف على العربية او يكون عندك وديعة في البنك تجيب عائد اكثر من 500 ج شهريا.. وتاخذ هذه الاورا ق وتوديها النيابة الادارية وهم يفحصوها وبعدين مش هتعرف النتيجة لانهم بيبعتوا النتيجة لبورسعيد باسمك.
4-بعد ما تستوفي الكلام السابق تروح القومسيون الطبي كان وقتها في المبتديان وتقريبا نفس الاجراءات اللي في الوقت الحالي(زحمه في المجالس الطبية- زحمة في كشف النظر-زحمة وشكل مهين جدا في كشف العظام وبيكون في ظابط موجود ساعة الكشف لان في ناس بيستغلوا البسطاء ويدوهو 5000 ج ويدخلو يكشفوا بيهم فبيعكشوا هناك) وبعد شهر نقريا تروح تسال يقولك على 3 ارقام صادرة(جمارك بورسعيد-مرور التابع له-جمارك القاهرة).
5-تروح بقى بورسعيد واستلمني ناس اسمهم اولاد حسين واحد منهم دكتور اسنان اسمه سمير وده ناصح شويه لاني بعد ما اخترت السيارة طلب مني الدفع كاش ودفعت كاش وبعدين طلب مني اكتب خطاب اني متنازل عن ضرئاب المبيعات وطبعا رفضت جدا وقلتله ليه قالي اجراءات وبيكلمني كاني مؤهل متوسط وعبيط (انا بكالوريوس تجارة-ادارة اعمال وبشتغل في شركة كبيرة) فشدينا مع بعض وبعدين قالي خلاص بلاش وطبعا كنت دفعت الفلوس –فات شهر والاستلام كان مفروض في خلال 20 يوم تقريبا فقعدت اتصل بيهم وهم يماطلوا وفي الاخر هددتهخم اني هبلغ عنهم نيابة بورسعيد- المهم قالولي جواب التنحريات موصلش...طب مقلتوش ليه ..ليه بتعذبوا في الناس-المهم سلموني العربية بعد الجواب ما وصل وطبعا لا يخفي عليكم ان بيتاخذ منها الحاجات المهمة(التسجيل-الكاسيت-الطفاية ممكن-مغير الطبلوة كان متغير لانه المفروض يكون دجيتال مثلا)-طبعا الهدف من كده انه يخفض الجمارك وبعدين يبعلك الحاجات ديه – طبعا بيعملك تجهيزة اي كلام عشان العربية لازم تطلع من هناك (جمرك بورسعيد) وبعدين تنقلبها ملاكي لما الجواب يوصل المرور بتاعك...طبعا كان هناك مشادات لكن انا عرفت اني لو مستلمتش هتروح علي العربية وهما عالم لبط وانا مليشفي البهدلة ..وبيني وبينكم انا كنت رافض موضوع سيارة من بورسعيد وكنت عايز اجيب سيارة عاديةاما احاول اخذ جزء من حقي في هذا البلد لكن قلت ...مبحبش البهدلة وقلة القيمة .....السماسرة هناك بيعتبروك صيدة....هذه كانت سيارتي الاولى وكانت جميلة لكن مفيش اي اوبشن خالص فاضية....بعتها بعد 5 سنين ب 34500ج
6- روحت افك الحظر وكان في الجمارك في امتداد رمسيس الدور التاسع تقعد نلف كام لفة حلوة وبعدين ياخذ البصمة وتيجي بعد اسبوع تقريبا تاخذ ورقة الجمارك اللي انا معملتش بيها اي حاجة في شراء السيارة الاخرى لان الجمارك بتشترط تكون بيعت السيارة القديمة الاول وبتعطيهم خطاب من المرور ببيع السيارة.
ثانيا:السيارة الثانية: دايو نوبيرا 2 مو 99 فول اوبشن كاملة: ب 43000 الف قبل ما يزودة الاعفاء ل 20000 الف ج وتبقى ب 27000 ال او 30000 ال
1-الاجراءات كانت اسهل بكثير جدا يعني مفيش حالة اجتماعية مفيش تحريات مفيش مفيش الوفاء والامل ..تروح المجالس الطبية وتاخذ ميعاد نظر وعظام وتستنى الجواب يوصل بورسعيد وتروح تتفرج على السيارة وتستلم وتدفع في نفس اليوم لكن بدون نمر.
2-فك الحظر كان اسها ايضا بكثير في 4 ش الطيران عند استاذ عزت وفعلا انا طلعت دفعت في الخزنة مرة واحدة فقط وبعدين اخذ بصمة وقالي تعالى بعد اسبوع تاخذ جواب للقومسيون الطبي عشان لو عايز تجيب سيارة ثانية ..قلتله لأ مش هروح القومسيون تاني ومش هجيب سيارة بهذه الطريقة مرى اخرى......طبعا المكان كان في جراج اتوبيسات الموظفين ومفيش مكان تقدر تقف فيه باحترام..
3- انا مش فاهم ليه يربطني 5 سنين ويذلني عشان مديني عربية ب 2000 دولار(مقيمة ب 28000) طبقا للافراج الجمركي واخذتها انا ب 43000 الف جنيه من السمسار(احسبوا انتم بقى) من 2000 دولار يعني حوالي 12000 الف ج الى 43000 ج
4-بالنسبة طبعا لحالات السيارات هناك فهي حالات شاذة لكن متنسوش ان هذه السيارات انتنهت من العالم وبيرموها للعالم الثالث بدل ما يودوها مقبرة السيارت(زبالة السيارات هناك) رغم حالتها
5- يوجد سيارات هناك مثل بي ام 316 موم 1997 بيبعهوهالك من 60 الى 70 الف وكذلك الباسات
6- كلهم في بورسعيد شغالين على الدايو والكوري اللي بييجي تقريبا مجانا لكن معرفش بيتقيم ازاي ويوصل للسعار الخرافية ديه..
7- انا كنت عايش في السعودية لفترة مع الوالد..في سوق هناك اسمه (الحراج) بيتباع فيه السيارات القديمة زي عندنا هنا(عارفين انك ممكن ب 2000 او 6000 ريال تاخذلك عربية تويوتا انظف من اللي هنا عندنا) اللي مش مصدقني ممكن يسال اي حد قريبة في السعودية....وسلملي على السيارات المجهزة والحظر الخماسي..
ارجو ان اكون عرضت تجربتي اعذروني ان كنت نسيت شئ واحب اقولكم اني هذ اخر تجربة لي مع السيارات المشتراه من بورسعيد وهشتري من السوق المصرية ان شاء الله
|
في حاجة نسيتها ...كان لابد انك تعمل خطاب ضمان بقيمة الجمارك(12000 ج) وقتها لصالح مصلحة الجمارك وتسترده مش فاكر بعد ما ترخص العربية او بعد ما تخلص الخمس سنوات....