[CARDIO]

شوف يا سيدى ..
المشكله الى انت بتقولها دى هى مشكله التعامل مع كل الصنايعيه ( الا من رحم ربى )..
اى حد بتتعامل معاه بالمره من مصلحته انه يكتر عدد المرات و مش من مصلحتك انت كده
يعنى لو اتفقت مع نقاشين على مبلغ يوميا شقتك مش حتدهن فى سنتها لكن لو اتفقت على مبلغ معين مقابل العمل هم اللى حيبقوا عاوزين يخلصوا ..
طيب و الحل ؟
مبدئيا روح لمدرسه سواقه عادى بس اسال حد يكون سبقك على حاجتين
1ايه اللى المفروض اكون اتعلمته مع نهايه الكورس
2 اسم مدرب كويس فى المدرسه دى
و لما تتفق مع المدرسه (انا اخدت الحصه ب 30جنيه)و تقابل المدرب ده تبتسم فى و شه و تحسسه انه باشا و ان فلان صاحبك هو اللى قاللك عليه ( اهم حاجه تحسسه بنفسه و ما تبقاش غشيم )
اه نسيت حاجه انت ليه احسن تروح لمدرسه مش تتعلم على عربيتك او عربيه حد ؟
لان الواحد فى الاول بيبقى خايف يموت حد او يخبط العربيه و ده ممكن مايخلكشى تركز او اللى بيعلمك على عربيته ممكن يخاف على عربيته و اعصابه تبوظ
تانى حاجه و دى الاهم انه بيبقى فيها فرمل عند الكرسى اليمين اللى قاعد عليه المدرب فيقدر يلحقك قبل ما تدوس حد او تلبس فى حاجه
طيب ايه اللى حتتعلمه فى اول حصه (اللى هى ساعه) -->انك ما تخافش لانك حتحس ان العربيه حاجه سهل التحكم فيها ان شاء الله
و تتعلم ازاى تطلع و ازاى تقف و حتبتدى تاخد السنس بتاع الدريكسيون و كفايه قوى كده على اول حصه
تانى حصه تاخد نمره المدرب على اساس انك لما تجيب العربيه اللى هو بعد شويه ( شهر مثلا)
ممكن تحتاجه يبقى يلف معاك شويه بعربيتك علشان تفتكرو انت كده مش بتكدب لان غالبا فى ناس برضه بتحب تتطمن بزياده و فى ناس بتنسى لو ما جابتش العربيه على طول و ممكن حد من اصحابك يسالك انت اتعلمت عند مين و كدة ..و بكده هو حيبقى حريص انه يبين لك اد ايه هو مدرب شاطرو يهتم بيك و انت حتتعلم كويس و لو احتجته بعد كده اديك رميت لقدام
و عند بدايه كل حصه سؤالك يكون ها حنتعلم ايه النهارده ( و على و شك فرحه الطفال ) ؟
علشان يبقى عارف انه لازم يقول حاجه جديده

و بالتوفيق و ابقى احكى لنا عملت ايه