[smartchoice]

و ده موضوع قديم كنت عامله و لكن تقريبا حصلت مشكلة فى السيرفرات فأتمسح

السلام عليكم ورحمة الله وبركاته

أنا بقالى فترة بفاضل بين الكيا سول و الكيا كارينز و الرينو فلونس و ده من ساعت ما شفتهم فى معرض أتوماك اللى فات و كنت مستنى بس أظبط الأمور المادية و أنطلق

المهم بقى روحت النهاردة عند محمد زكى اللى فى القطامية (هو نفسه فرع الصيانة التابع للتوكيل علشان مأجرين منه جزء للصيانة)

المهم ركبت السول و لقيتها تحفة و ركبت الكارينز بس معجبتنيش أوى زى السول و لقيت الفرق بينهم فى الحجم الداخلى مش كبير أوى

الكراسى الخلفية للكارينز أوسع سنة بسيطة و مش مؤثرة أوى و على فكرة العربيتين نفس العرض تقريبا بس البومبية بتاع الكارينزا مبينها أكبر و الكراسى الأمامية السول كانت أريح فى وضعية القيادة الشنطة بتاعت الكارينز أوسع شوية حلويين عن السول الصراحة بس الشنطة مش مهمة قوى خصوصا أن العربيتين ليهم خوص فوق السقف و كله تمام (على فكرة أنا طولى 190 سم و عريض كمان و الدنيا بايظة و قعدت قدام و رجعت الكرسى للأخر لحد ما كله بقى تمام و نزلت قعدت ورا و كنت قاعد مستريح و الفرق بينها و بين الكارينز مش كبير و مش مؤثر أوى)

جديد 2011 فى السول بقى نازلة الفئة التوب لاين وكيل ب 129,000 عند محمد زكى فيها كل ما تتمناه الأنفس

فرامل abs + كاميرا ركن خلفية + مرايات ضم كهرباء + 2 وسادة هوائية + فتحة سقف + سبويلر + دركسيون مالتى فانكشن + فتحة AUX لذيذة+ 6 سماعات و 2 تويتر و صب أوفر (أنا مش بسمع غير قرأن و الحمد لله) + السماعات بتنور بس ممكن تقفلها خالص و ده اللى هيحصل أن شاء الله + شوية الكماليات العادية فى كل العربيات

الجديد بقى أنهم شالوا الجزء بتاع تخزين العدد اللى كان تحت الشنطة و خلوا الأستبن يبقى جوة العربية مكان جزء التخزين (أستبن معوق بتاع عجلة أخرو 80 كم/ساعة)

الفتيس الجديد الأستبترونك نزل كمان و شبة بتاع السيراتو

عملوا حركة فى منتهى الغباء و حارقة دمى من ساعتها ..كلنا عرفين أن الفانوس اللى ورا للسول شكله تحفة ...العباقرة راحوا مخليين الجزء بتاع الأشارة لونة بمبى فاتح شكله زبالة و مستفز جدااا .. مش عارف لية عملوا كده...مفيش حاجة كاملة الكمال لله وحده

المهم أن العربية أنا جايبها للعيلة مش شبابى زى ما الناس فاكرين دى حلوة جدا و كأنك راكب SUV ضغنططة شوية و أعلى من الكارينز و متهيألى مش هتحك فى المطبات و كمان حكاية أن الشنطة أصغر هتخلى التكييف تأثيره أقوى و أنا فى أنتظار معرض الأهرام على أمل انهم ينزلوها 2000 و لا 3000 جنية يبقوا حلويين فى الترخيص أو لكماليات أضافية (بس يا ترى فى أية كماليات تانى ممكن أجبها !!)
لا ينقصنى غير دعواااااااااااااااااااتكم و تساهيل ربنا

شوية الصور بقى



الكرسى راجع على الأخر و القاعدة و را واسعة بردوا و لكمة سول فى كل مكان



الأستبترونيك الجديد و الفاتحة اللى فوق الأنتظار معدتش مقفولة-طب بالذمة دى هتكلفهم أية!!!-لازم سنة ..... فى كل حاجة



الشنطة المطورة و الأستبن تحت حتة الجلد التعبانة دى -مش قد كده- الشنطة حجمها معقول و تاخد شنطتين سفر متوسطيين وقفيين ورا بعض



الفانوس الغبى و اللون الأحمر الولعة- انا ناوى عليه إن شاء الله هو أو الفسدقى(كان نفسى فى الأبيض العادى بس التوكيل مش منزله التوكيلات فى مصر شلل و حتى الفسدقى بيقولى هتستنى شهرين علشان أجيبهولك الموجود كريمى و فضى و أسود و أحمر و دول تسليم فورى عند محمد زكى)

و بكدة التقرير المختصر خلص و أتمنى انه يكون عجبكم و أن شاء الله هغرقكم تقارير عنها لما أستلمها
و كان معكم مراسلكم سمارت من عند محمد زكى القطامية....موسكو