رد: كيف تفوقت هيونداي على اليابانيين والغربيين؟! - منقول
شكرا يا أ / أحمد عالموضوع ده ،،
انا اتفق مع هذا الموضوع بنسبه 100%
و فعلا ده فكري
يمكن عشان المصدر سوري فكرهم قريب لفكرنا و ثقافتنا يمكن لو مصدر خليجي مثلا كان الوضع اختلف
الجزء الأول فعلا قصه نجاح هيونداي حكاية غير طبيعيه
و تطورها السريع و تطور الجودة و التقنيات
مش محتاجه اضافه
الجزء الثاني
العربيات الآسيويه خاليه من الابداع ،، و متعة القيادة
و طبعا بالنسبة للفئات اللي بنركبها في مصر هيكون ده واضح اكتر واكتر
هيا وسيلة مواصلات عملية مريحة ...................... وبس
و ده اللي انا بقوله من زمااااااااااااااااااااااا ااااااااااان
ليه بتدفعوا كل الفلوس دي و مصاريف الاقتناء دي في العربيات الياباني
لا شكل و لا روح و لا اداء
يا عم ما عندك بديل ارخص
و الاتنين تصنيفهم وسائل مواصلات
هتقولي بس الجودة و العمر
انا هاصدق علي كلامك بس هوا انتا عايز ايه من العربية غير خمس سنين بافتراض ان العربية الياباني بتعيش عشره و الكوري بتعيش خمسة
و في بلدنا الجميل جودة ايه هتنفعك في حفرة اتحفرت باليل و وقعت فيها الصبح و ميكروباص اداك بوسه و صنايعي ظريف نسي طبه الزيت مفتوحه
و عن تجارب شخصية كتير في الآخر حكاية العمر الطويل دي سببها الوحيد الاستخدام السليم
عربية ابويا الله يرحمه اوبل موديل 75 فضلت مع ابويا الله يرحمه عروسه لحد ما توفاه الله سنة 89
احنا و لله الحمد جيبنا اجلها في سنتين بمعني الكلمة
مع ملاحظة شئ العربيات الآسيويه عموما بتقدم بسرعه و ليست سيارات العمر الطويل
مش حكاية اعتماديةانا شخصيا مقتنع ان العربيات الاسيوية اكثر اعتمادية من العربيات الاوربية لبساطة التكنولوجيا فيها
و لكن العربية بتحتفظ برونقها بمعني اخر بص لعربية بي ام الفئة الثالثة موديل 98 و بي ام الفئة الثالثة موديل 2008 . أو باسات أو حتي بولو و ابيزا
هل بتحس ان دي عربية من زمن فات او بتحس ان فيه فروق بالسنوات الضوئية ؟؟؟
لا بتحس انها نفس الروح و الاستايل و تحس انها لسه ما قدمتشي و تحس انك تنفع تركبها اليومين دول مش عربية قدمت و راح عليها
في المقابل شوف اللانسر كريستاله و اللانسر شارك ، شوف الكورولا العيون و الكورولا الجنوب افريقي كمثال
فروق بالسنوات الضوئيه تحس عالطول ان العربية دي من عشر سنين و مالهاش اي علاقه بالموديل الاحدث
الشركات الاسيويه ............ زي نوكيا في الموبايلات .......... تنزلك خمسين موديل في السنة اللي بيلف و اللي بيدور و اللي بيتزحلق و الاسود و الابيض ،،،، فكر تجاري استهلاكي اشتري و غير و عينيك تزغلل ،، يمكن يكون فكر المجتمع الأمريكي الاستهلاكي الراسمالي
و عشان كده دايما تلاقي السوق مليان سيارات حديثة اسيوي موديلات سنة و سنتين فاتوا
و العكس بالنسبة للاوربي عشري اوي مع اصحابه
لكن احنا طبعا في مصر نتيجه لرياح قادمة مع الكفيل و غربة السنين للعودة بالمروحة من بلاد الجاز
اعطينا مكانة و قدسية للسيارة اليابانية فمنقدرشي نهاجمها بالشكل ده
و بنتشطر بس عالكوري
و كمان لأن علاقتنا بالكوري معظمها مع اقل فئاته ( الانتري ليفل ) سيارات المدينة زي الاكسنت و اللانوس و البرايد
لكن مع الياباني مع الفئات العائلية الأعلي شويه زي اللانسر و الكورولا و الصني
و ده باين من الرأي الحكيم لاصحاب الموضوع لما شبه تويوتا بهيونداي
حاجة أخيره انا من الناس اللي شايف الجينسيس شكلها تقليدي جدا جدا
سألوا مدير في هيونداي ليه الجينسيس شكلها تقليدي كده ؟؟
قالهم احنا مكناش عايزين نعمل عربية اللي يشوفها في الشارع يقول ايه العربية الغريبه دي ؟؟
يعني هوا عايز يمشي جمب الحيط عشان عارف ان الناس ممكن تتريق عليه ،، هوا عامل عربية شكلها مقبول لمعظم الناس
فاهم ان الناس بتتقبل الشطحات من مرسيدس و بي ام و غيرهم ،،
لكن مش هتقبلها من هيونداي ،،
فكر تجاري ليه احترامه
باختصار ده رايي دايما
لو ان معايا فلوس و دخلي يسمح عايز عربية ركوبه زي ما بيقولي هاجيب الماني و توابعه
لو انا عملي و عايز وسيلة مواصلات ظريف و مريحه هاجيب كوري و اوفر فرق فلوس انا اولي بيها
خصوصا مع الموديلات الحديثة لهيونداي و كيا
يا جماعه رأيي يعبر عن وجهة نظري
و اختلاف الرأي لا يفسد للود قضية
التعديل الأخير تم بواسطة Ahmed Anwer ; 28-12-2008 الساعة 11:14 PM
|