[تامر ديزل]

المشاركة الأصلية كتبت بواسطة mazagngi2010 متشكرين على اهتمامك وردك عن الاستفسارات يامحترم وياترى معدل العمرات بيكون كام الف كيلو تقريبا ولو على حسب طبيعه الشغل لو شغل قاسى كام ولو سفر طوالى كام ويعنى ايه الشوك(واحد قاللى حاجه زى الفرامل ) وممكن توضحلنا لو طالع مطلع من السكون وانت محمل بتعمل ايه لانى مره لاقيت عربيه بترجع لورا ومره تانيه دخنه طالعه جامد من الشكمان ويتهيالى دى من اصعب المواقف لكم

يا مساء الفل عليكم وعليك يا معلم مزجانجي
عمرة الموتور ف العربيه النقل تختلف من عربيه للتانيه ومن ظروف شغل للتانيه انما لو خدنا عربيه بتشتغل حمولات في اطار المسموح اللي قولت عليه قبل كده دي ممكن تقعد لحد مليون كم وكل ما يكون شغلها اكتر من كده في الحمولات تقل الكيلومترات دي لحد ماتوصل ل نص مليون كم وعلى فكره ده مش رقم معجزه في النقل لان العربيه بتعمل متوسط 10 الاف كم شهري يعني النص مليون تجيبهم بعد اربع سنين بس
بالنسبه للتشوك هوا بلف على الموتور ليه زرار او دراع حسب نوع العربيه بيكون موجود قدام السواق ف الكابينه بيستخدمه السواق علشان يهدي الموتور يعني يقلل من عدد لفاته وهوا نازل منزل منحدر زي الكباري مثلا علشان يساعد مع الفرامل شويه لان الحموله بتكون بتدفع العربيه لقدام لانها بتكون اعلى في الارتفاع من العربيه
وبالنسبه لطلوع مطلع من السكون بعمل ايه ؟ الصراحه انا مبعملش حاجه لاني مش سواق انما السواق بيدي للعربيه الغيار الاولاني بطئ ويطلع ولو الفتيس بتاعه فيه غيار اسمه غيار الصعود وبيبقى رمزه C بيستخدمه بدل الاولاني بطئ
وبالنسبه لاصعب المواقف لنا انا شاكك انك شاكك اني سواااق ؟ مش عارف ده شكك لوحدك ولا بقيت المنتدى شاكك معاك ؟.... يمكن علشان الاسلوب بتاع الموضوع ده بساصل انا بحب اتكلم بلغه سهله وبسيطه علشان توصل للكل ونقدر نتواصل بيها انما لو عاوزين كلام كله انجليش واكسبريشنز موجود بس مبحبوش
ياللا سلام مؤقتا