سيارات رينو الحالية
سر حب مالكى الميجان II لسيارة
سؤال لملاك الميجان، ليه بتبيعوها برخص التراب
لو فى حد عايز يتناقش
بعقلانية بعد قراءة المواضيع الثلاثة السابقة بعناية...أهلا و سهلا به
بس لازم يكون فيه تقبل لاختلافات فى الرأى المبنية على أساس منطقى
أنا شايف إن الوحيد إللى مش معجب بالميحان بالرغم من امتلاكه لها هو هانى ( Payoo )...و الحمد لله إنه ارتاح و باعها بعد طول المدة إللى كان عارضها فيها.....
لكن قصاد العيوب ( سعر إعدة بيع منخفض - عدم انتشار ) هناك الكثير من المميزات و المزايا
و لو فى واحد هانى Payoo فيه 50 واحد مبسوطين بيها جدا
الحاجات إللى استكى منها هانى Payoo ...زى سحب ضعيف...سعر بيع منخفض.....التكييف فى أداءه و أداء العربية مع تشغيله....أسعار القطع...لو فى حاجة تانية ياريت حد يفكرنى
العربية...مش سيارة رياضية....لو عايز أداء رياضى...فى منها موتور 2000 سى سى و فيها منها بشاحن توربو....
دى عربية عائلية...معمولة لتوفير الراحة و العزل و السلاسة فى الاستعمال...و هى ناجحة فى كده تماما و لا يضاهيها أى سيارة أوروبية غير فرنسية أخرى... و لا ألمانى و لا غيره
و على فكرة.....هى مش توك توك فى بطئها زى ما انتم متصورين....دى عربية عايزة واحد مهتم باكتشافها....الفتيس بتاعها فى برامج تناسب أنماط القيادة المختلفة....لو إنت مش عارف تجيبها على ال Sport Mode ده مش ذنبها.....
و لو عايز عربية تركبها و تدوس و تمشى و بس....فاليابانى خير رفيق......بلاش أوروبى من أصله
سعر إعادة البيع المنخفض مش ذنب شركة رينو ..و هى لم تدعى إن سياراتها أحسن حاجة فى إعادة البيع و لا بيدوا ضمان على كده مع العربية....و الله بقى تمنها 160 ألف و اتباعت ب 60 ألف و لا حتى جابت 1/10 من ثمنها...فده مش عيب للعربية أو المصنع...دى ثقافة سوق مش هتقدر لا الميجان و لا اللوجان يغيروها..و كمان دى ظاهرة عالمية..مش فى مصر بس...و لو السبب إن العربيات الفرنساوى مش مكويسة فى المستعمل علشان هى وحشة..كانت فرنسا قفلت من زمان مصانع السيارات و قلبوها مصانع برفانات مثلا....و متطلبات زبون المستعل مختلفة عن الزيرو.....فده لازم ينعكس على سيارة تخاطب ذوق محدود من الأصل
أنا موافق على مسألة إن التكييف فوق درجة حرارة خارجية 40 مئوية بيكون ضعيف....و المكيفات اليابانى أفضل فى درجات الحرارة المرتفعة.....لكن كام يوم فى السنة بأكون الساعة 3 الظهر فى الشارع و درجة الحرارة فوق ال 40 علشان أقول دى عربية أى كلام و المروحة إللى فى بيتنا أحسن من تكييفها...!!!
و إللى مش عاجبه تكييفها...جربتم التكييف السخن ؟؟؟....ده لوحده يستحق موضوع منفصل عن روعة أداءه...لكى أعطى مجرد فكرة....أنا لابس بنصف كم....درجة الحرارة 10 ...التةقيت بعد منتصف الليل و المكان على الأوتوستراد فى صحراء حلوان...الشباكين الأماميين مفتوحين تماما و التكييف الساخن بأقلل من درجة سخونته إلى 25 فقط علشان اتحريت....
فعلا فى حالة تشغيل التكييف التسارع بيتأثر بشكل ملحوظ و خصوصا على السرعات المنخفضة و داخل المدينة...لكن الحال بيختلف كتر على الطرقات المفتوحة....التسارع على السرعات المنخفضة بيتأثر لكن الوصول لسرعة عالية شىء معتاد...يعنى تمشى على 140 و لا 180 حتى و التكييف شغال مافيش مشكلة خالص.....لكن تقضيها غرز و شد داخل المدينة على سرعات من 40 إلى 100 هتلاقى فى فرق عن لو من غير التكييف....لكن أرجع و أقول...لو هو ده المقياس الوحيد لنجاح العربية...يبقى هى فعلا فاشلة...لكن - مع خالص احرتامى - أنا مش هأتناقش مع حد مقياس نجاح عربية ما عنده هو التسارع على تلك السرعات و التكييف شغال......
أسعار قطع الغيار......زمان...كن التوكيل محتكر - عن غيرقصد للإضرار - القطع كلها....الدنيا اتغيرت دلوقتى كتيير و بقى لها فترة كمان
فى قطع غير أصلية أوروبية و آسيوية و صينية كمان.....ده بخلاف الاستيراد إللى فعلا بيكون هو الأمثل فى بعض الحالات زى الأجزاء الخارجية .....
مثال...تيل الفرامل ب 450 جنيه فى التوكيل.....خارج التوكيل موجود بنفس السعر لنفس التيل ....يعنى مافيش شبهة مغالاة فى السعر من جانب التوكيل.....و فى حاجات تانية ..أسبانى ب 250 و غيره...
الخلاصة.....السيارة أبعد ما تكون عن الفشل...العربية دى هتعلم فى ذاكرة صناعة السيارات بصفتها الأولى التى تقدم التقدم و التطور التكنولوجى الهائل الموجود فى السيارات الفارهة إلى السيارات المتوسطة و بكفاءة معقولة جدا...و تأتى لتغلف هذا داخل كبسولة أنيقة تهتم بأدق التفاصيل لكل المستخدمين و تحمل فكر و شخصية صانع عملاق يداعب خيال محبيه و معجبيه بكل ما هو جديد