من فترة سالت حضراتكم عن اى انواع المساعدين افضل لاسبرانزا 516
وبشكر كل اللى ساعد فى الرد
دورت كتير فى صفحات منتدانا الجميل على تجارب الاعضاء فى تغيير المساعدين الخلفى والامامى
وكلنا عارفين ان مساعدين وبطاحات ومعظم العفشة هى لانسر بومة 1600 سي سي
لكن
كان نفسي اجيب مساعدين مونرو وبالسؤال لاكثر من عضو اتضح انها حظوظ ونفس النتيجة بالنسبة لمساعدين الـ KYP
سالت عند لهيطة فى التوفيقية ودة موزع معتمد واشك انة الوكيل لان الوكيل هو غبور
قالى ان الامامى مش موجود والخلفى سعرة 760 جنية
فهاؤلكم انا عملت اية
جبت جلب مقصات بتاعة لانسر وخلى بالكم لان سعرها من 30 جنية للجلبة الواحدة الى 130 جنية للجلبة الواحدة الكبيرة طبعا بتاعة لانسر اصلة وجبتها من عند حبلص اللى فى الحرفيين جبت عدد 2 جلبة
وبلى بطاحات من نفس التاجر بـ 110 للواحدة لانسر اصلى
نزلت شارع دمش وجبت من زكى جرجس الحاجات الاتية
جوز بيض طرف صينى بـ 100 جنية ودى صورتة
جوز بيض مقص صينى بـ100 جنية ودى صورتة
جوز بطاحات صينى بـ 130 جنية
جوز مساعدين امامى صينى بـ 360 جنية
جوز مساعدين خلفى صينى بـ 250 جنية بس خلو بالكم فى نوع بالطبق وفى نوع من غير الطبق
انا اشتريت الطقمين واشوف انهو اللى هايركب وارجع التانى وطلع ان الاثنين واحد فبالتالى يبقى ابو طبق انسب ودى صور العادى واللى بطبق
وعلبة السجاير دى مش مع المساعدين ولا حاجة
ودى صورة للبيض بعد تركيبة ولزيادة الامان لازم تدى بيضة المقص بنطة لحام
واشتريت جوز كبالن صينى بـ 280 جنية وفى نوع بـ 180 جنية بس مش كويس
وللاسف الموبايل كان فضى شحن معرفتش اصورة
وخرجت من عند العفشجى ورحت جبت اربع فرد كاوتش كومهو فيتنامى من عند اشرفكو الفرع الجديد اللى فى جسر السويس قبل الجراج مباشرة وسعر الفردة 425 جنية شامل بلف وترصيص ونيتروجين
النتيجة
بامانة زى الفل زى الفل زى الفل
العفشة بقت مكتومة اوى ومبقتش احس بالمطبات الصغيرة اللى كنت بحس بيها الاول
الشاهد من الموضوع ان المساعدين الاصلى بتوع سبرانزا مش وحشين ولا حاجة لان فرق السعر كبير اوى بصراحة
سعر الـKYP 950 جنية للامامى
وبرضة مش مضمون
العربية حسيت انها عليت شوية
وبالمرة بقى وانا فى شارع دمشق جبت شاشة اللى بتركب على مراية الصالون 7 بوصة بـ 450 جنية
وجبت كاميرا ركن ركبت اسفل الشنطة فى مكان مش باين بـ 200 جنية وصورتها معقولة اوى باليل وممتازة بالنهار
جبت كسوة للكراسى جلد خالص خامة محترمة اوى بـ 400 جنية
عملت ارضية جلد للصالون والشنطة بـ 280 جنية
واكلت عند جاد فى اخر الشارع بـ 16 جنية 2 شاورمة
بس لى سؤال فى الشاشة لانها جننتنى
لما بحط عليها MP3 + ملفات فيديو ....بتختفى ملفات الفيديو
انما لما بحط عليها ملفات فيديو فقط بيشتغلو حلو اوى
حد يعرف المشكلة فى اية