[zing0]

السلام عليكم
الموضوع ده حصل من يومين و طبعاً أتعلمت منه حاجه حبيت أفيد بيها غيرى
--------------------
المكان: كورنيش النيل (القاهرة) - طرة الأسمنت - أمام حديقة النيل و بجوار سور أرض فضاء بجوار مصنع النشا و الجلوكوز
الزمان: الساعة 8 مساءاً
الأحداث:
كان عندى مشوار لمدة ساعتين فى المكان ده, أضطريت أركن العربيه عالكورنيش (و العربيات رايحه جايه) بس مفيش حد ماشى و مفيش محلات فى المكان ده (سور أرض فاضيه)
قضيت المشوار و رجعت لاقيت 2 شكلهم سوابق و بيضربوا زفت و مساطيل ساندين على شنطة العربيه من ورا و تقريباً بيلفوا بانجو أو حشيش... (عرفت بعد كده بيلفوا أيه)
المهم, دخلت عليهم, و رميت السلام.
عربيتك دى يا باشا - أيوه, و فتحت العربيه
طلعوا وقفوا جنبى و محسسنى أنهم فى موقف (باركينج)... عادى
فتحت الكبوت و طلعت كابل الموبينه إللى لأول مرة فى حياتى أفصله, طلعته من جيبى و ركبته و واحد فيهم بكل رخامه بينورلى بالموبايل علشان يشوف بأعمل أيه.
دخلت العربيه و فتحت زرار الفصل و سميت الله و دورت, و البلطجيه واقفين جنبى
طبعاً كلامهم مش باين بس عمالين يقولوا عربيتك بحالها و إطمئن على حاجتك و شوف الإستبن
طلعت فكه (فضيه) زى أى بارك فى الشارع , واحد منهم بص و قاللى أيه ده دول ميجيبوش لب, عاوزين 50 جندى !!!!
- رغم أنى مش سريع البديهه نهائى و (على نياتى) أوى, حسيت أن أفضل حل الهروب, خاصة الشارع ورايا كان فاضى خالص
جبت مارشدير فى الظلام, و دوست بنزين و عدلت الدركسيون و طبعاً مفيش وقت للمرايات و طير يا معلم
الغريب أنهم أتسطلوا لدرجه إنهم طلعوا يجروا ورايا فى شارع فاضى, و من فضل الله تعبوا و كملت طريقى سالماً بحمد الله
طبعاً كنت بأجرى عالكورنيش زى المجنون و رجليا بتخبط فى بعضها مش حاسس فين الدبرياج و فين الفرامل و فين البنزين
ركنت العربيه أمام البيت كالعاده و خرجت أتأكد منها, لاقيت الحراميه دخلوا قلب الكالون بتاع الشنطه لجوه و بقيت ممكن أدخل أيدى كلها و هيا الشنطة مقفوله !!!
حاولت أظبطها لحد الصبح و طبعاً لاااااااازم أروح لبتاع ضبط أبواب يشوفها
----------------------
الدروس المستفاده
1- الأذكار على قدر جهدك حاول تواظب عليها
2- عربيتك تتجرح فى شارع زحمة أحسن متتسرق فى شارع هادى

اللهم إحفظنا و سلم طريقنا و رد علينا ضالتنا
آمين يا رب