تقرير استخدام وصيانة ال 15,000 للامجراند 7
الحمد لله توجهت يوم 5/6/2013 لابو رواش و كنت هناك الساعة 8:45 صباحا .. دخلت و غصت ما بين الايميهات الكتير اللي منتظرين زييي .. عدد الايمي كان غير ما رحت في صيانة الالف شهر يناير اللي فات .. المهم .. طبعا استقبال فرد الامن للسيارات و تسجيله للعربية و الاسم والسؤال عن رقم الحجز .. اللي له رقم حجز له الاولويه .. بس للاسف الفرد ده محتاج تدريب مهارات تواصل عشان هو بيعامل الناس بطريقته مش بمهنيه و الابتسامة غائبة .. بالاضافة الى ضيق المساحة امام المركز و اللي بسببه وانا بحرك عربيتي حكيت في عربية تانيه حكة على خفيف ... طبعا انا كنت رايح عندي اعطال و صيانة دورية في نفس الوقت ... في اثناء الانتظار سعدت و تشرفت بلقاء كل من ياسر كمال و محمد كرم .. مع حفظ الالقاب .. الامجرانداوية بخير .. .. بما اني كنت ضيف لتاني مرة فقط في ابو رواش حسيت اني تايه... و مستني اللاشيئ .. لولا محمد كرم باشا الله يكرمة خدني من ايدي زي اللي خاطف حد و دخلني للمهندس ناصر .. مدير المركز .. راجل بشوش و مهذب و يجيد الاستماع .. خد مني 9 مشاكل اساسيه ..
1- رعشة و صوت رجرجة في جسم السيارة عند الانطلاق على الاول بسرعة ..
2-فصل التكييف المتكرر و سوء ادائه نسبيا في حالة الثبات و تحسنه عندما تتحرك السيارة ..
3-هبوط دواسة الفرامل او ارتفاعها قليلا مع فصل الكومبريسور و توصيله
4- وجود رعشة خفيفة في الطارة عند استخدام الفرامل على السرعات فوق 140 ..
5-صوت الشكمان عالي نسبيا ,,
6-توقف عداد ال RPM احيانا عند تشغيل السيارة بعد اطفائها لمدة دقيقة او دقيقتين .. وبالتالي تنور لمبة التشيك .. و بيشغل في التدويرة اللي بعدها
7-صعوبة في غلق الباب الخلفي يمين بحتاج قوة معينة مش هبد يعني ..
8-فرامل اليد كانت ناشفة و مش قويه ..
9-مؤشر الوقود كان بيهيس في شرطة اول ما افول و يديني 7 شرط بس ..
وبعدين يا يكمل 8 شرط بعد اما امشي شوية يا اما يفضل مريح لحد ما الشرطة الاولى تخلص .. براحته يعني ..
كانت هذه البنود في ورقة امام المهندس ناصر .. دونها في تقرير الصيانة و مضاني .. و طلعنا نجرب ساق و جرب و شاف ملحوظاتي و رجعنا على الورشه خد العربية .. قعدت انا و الرجالة محسناش بالوقت .. محمد كرم استلم عربيته و كله تمام و مشي و انا استنيت لحد تقريبا الساعة 1:15 ,, كلمني مهندس ناصر و قالي ان العربية خلصت و على التجربة .. طلعت سقت و جربت كل الملحوظات الرئيسية لاقيت كله تمام الحمد لله .. الرعشة و الصوت راحو و فرامل اليد لاقيتها اتحسنت ومسكت جامد و مؤشر الوقود فل تانك والتكييف شغال تماااااااام تلاجة ..
الحاجات اللي ماتعملتش او بمعنى اصح هو كان صريح معايا فيها من الاول وقالي دول ممكن يتعملو في زيارة تانية موضوع الباب لان عندهم عجز في السمكرية او مكانش في حد النهاردة .. حاجة كدة .. بس هو وعدني انها تتعمل في الزيارة القادمة .. و موضوع الشكمان قاللي ان الشكمان ده صوتو كدة عشان تلات مراحل و وهو صوته عندي كان في الحدود الطبيعيه .. وبالنسبة لرعشة الطارة في الفارمل على السرعات العاليه قاللي صعب نجرب سرعات زي 140 و 150 لان مفيش طريق قريب يسمح.. بس قاللي هيشيك على الطنابير لو فيها اي مشكلة .. وبالنسبة لهبوط الفرامل او ارتفاعها مع التكييف قاللي طالما قوه الفرملة واحده يبفى مفيش مشكلة .. وان الايمي كدة .. وانا صراحة الموضوع مش عاملي ازمة فتقبلت الحجة ... لانه ارتفاع طفيف جدا .. وايضا اكدلي المهندس ناصر ان سوء التنظيم في ساحة انتظار السيارات هتتحل خلال شهر او اتنين لما المباني تخلص و صالة الانتظار هتكون مفتوحة على الورشة .. زي بقية التوكيلات
المهم خلصت و مشيت ... كنت براقب مؤشر البنزين .. قلت هيبقة 7 شرط عند 120 كلم بعد اخر ريسيت للتريب زي اول ما جبتها .. عديت ال 120 كلم على التريب .. و لسه 8 شرط .. قلت بقت موفرة في البنزين .. لحد 150 كلم و برضو 8 شرط .. قلت استنى 185 كلم برضو 8 شرط ... كنت وصلت البيت .. كلمت المهندس ناصر و شرحتله المشكلة ..يا اما اروحلع تاني او اعملها في شرم .. واتفقت معاه اني لما ارجع شرم هروح مركز الخدمة اللي هناك و هو هيقلهم يعملو ايه .. لانها رجلاش كهربائي يبدو ان الفني اتوصى بيا و فوللي العربية للابد ... كتر خيره و الله ..
ملخص الموضوع انهم بيحاولو يرضو العملاء .. و يمشوهم مبسوطين .. وانا لولا موضوع الحكة ده و الموشر اللي علق .. كنت هكون اسعد ... وانا برضو الحمد لله راضي ..لان عبد المسيح اصر عليا اصرار شديد اني اجرب العربية مرة و اتنين وتلاته لحد ما اكون متأكد ان كله تمام .. و المهندس اكرم ايضا قابلته وقالي لو في اي حاجة في العربية قولنا عليها .. حسيت باهنمام من الجميع صراحة .. مش لشخصي فقط .. انما لكل اعضاء جروب نادي الامجراند الكرام لان المهندس ناصر ايضا راجع مع ياسر كل حاجة و جربنا مع بعض... و اتمنى ان ده يكون مبدأ غبور مع كل عملائه مش اعضاء النادي فقط ..
و الحمد لله رجعت على شرم الشيخ يوم الجمعة 14-6-2013 .. العربية مريحة و جميلة و ثابته في السفر ..متوسط سرعتي كان 140 ووصلت ماكس سبيد 180 كلم .. و الثبات هايل ما شاء الله .. بتوع الاوكتافيا والعربيات العالية اللي معايا على الطريق بيبصولي و يستغربو .. وكأنهم بيقولو ( ايه ده . هو مش خايف وهو ماشي 180 بعربية صيني ) .. 480 كلم المسافة المقطوعة بالتكييف على السرعات المذكورة ..و الاستهلاك بتاع الوقود كان 45 لتر ..الحمد لله راضي جدا عن العربية حتى الان .. و ربنا يستر طريق الجميع .. ..
شكرا للمتابعة ..
طولت عليكم .. ..
|