[ميدو عمر ايمن]

اولا : انا قرات كل المشاركات من اول الموضوع الي اخره
توصلت الي فكره عامة وحكم من خلال تعليقات الاعضاء
1- ان كل الناس الي بتشتكي من كلمة مستعمل اشترت عربيات منتهية الصلاحيه ورخيصة جدا وقديمة يعني عربيات ميته اصلا او اشتري عربية حديثة بس وقع فيها يعني بالبلدي كده صاحبها الاولاني فرمها وخلاها معدومة سواء بالاهمال او بعدم الخبره او بالبخل عليها يعني خد حلاوتها من غير ما يصرف عليها ولما باظت باعها ورماها
2- شراء عربية مستعمله يتطلب الخبره وعدم الثقة العمياء في الخبراء الي حضرتك واخدهم معاك وممكن يبيعوك ويطلعوا بمصلحه من صاحب العربية اصلا علشان حضرتك تشربها بالسلامه ومن ناحية تاني تبقي زبون مستديم عندهم وده اهم سبب في وقوعك في عربيه مستعمله تطلع عينك بعد كده
3- الناس الي تشتري من وراها مستعمل ودول كتير الناس الي تهوي التغيير والتحديث يعني موديل 2010 معاه قديم عاوز احدث - العربية مبتسحبش وعاوز يطير يغير - العربية شكلها وحش وموديل تاني برستيجه عالي يغير - الاوبشن في عربيتة قليل يغير وغالبا الناس دول فاهمين يعني ايه عربية

4- الطبقة الي بتدور علي مستعمل الناس الي زينا عاوز يرتاح من قرف المواصلات هوه وعائلته يعني عاوز حاجة تنقذه من قرف المواصلات والبهدله ومبيدورش علي عربيه يعمل بيها منظر والناس تقله يا باشا يا بيه ويروح يصيف بيها في مارينا ويشتي في اسوان - يا دوب حاجه تحافظ علي ادميته في الشارع والطبقه دي الي زينا امكانياتها لغايه المستعمل بس ولا يمكن يفكرفي الزيرو لانه يعتبر خيال وده السبب الاساسي والاساسي والاساسي اننا نشتري مستعمل .
5- كلنا نعرف ومتاكدين ان المستعمل ده فيه عيوب يعني صلاحيته قلت وقطعه تهالكت وجودته اصبحت اقل من الزيرو بكتير جدا لاكن الشاطر الي يقع في عربيه عيوبها اقل من مميزاتها او اضعف الايمان تكون اقل عيوب ويبتدي يصلح عيوبها واحده واحده علي قد امكانياته لاكن الي بيقع في عربيه مستعمله عيوبها اكتر من مميزاتها يسب ويلعن في المستعمل
6- الفكره العامه لكل واحد رايح يشتري عربية مستعمله انه عاوز يشتري عربيه زي الصاروخ مفيهاش غلطه باقل سعر وبيشتريها لما يوهمه صاحب العربيه والخبراء المصاحبين له في رحله البحث والشراء ويقتنع لاكن لما يفوق من الوهم ده يلاقي الحقيقة المره ويسب ويلعن في المستعمل
لــــــــــــــــــــــــ ذا
* كن مقتنع تمام الاقتناع بانك هتشتري سيارة فيها عيوب لانها مستعمله وده شيئ طبيعي مهما وصف لك الاخرين مميزاتها فتوجد بها عيوب حتي لا تصدم بعد ذلك
* اذا اردت ان تشتري مستعمل وتعيش مبسوط لازم يكون عندك خبره خبره خبرة في السيارات والا هتقع وتغني ظلموه
* ابحث وتاني واتفرج وقارن واستعين بخبرات الاخرين
* اشتري عربيه تكون مش رخيصه ومش مبهدله ويكون صاحبها واخد باله منها وده تحسه في العربية علطول لما تشوفها ان صاحبها فاهم وده طبعا ميغنيش علي انك تفحص العربية وتشوف كل حاجه
لــــــــــــــــــــــــ ـــــذا
حكمت المحكمة ببراءة المستعمل من التهم الموجه اليه وحبس المشتري لانه هوه الغلطان

والراي الاول والاخير لكم
مجرد رأي
يحتمل الصحه
يحتمل الخطا