السلام عليكم ورحمة الله وبركاتة
انا شاب ساكن في مدينة الآلام ( السلام)
وحبيت اعلق على كل الى قالوه الاعضاء على المرور الجميل دة هههههههههه ش
المشاركة الأصلية كتبت بواسطة herlom
انا عن نفسى اسوأ مرور هو مرور السلام وما ادراك مرور السلام
فى شهر يناير السنة ده روحت مع والدى علشان يجدد رخصة العربية وطبعا من اول ما دخلنا وعدد كتير جدا من البلطجية والحشاشين بيعرضوا عليك انهم يخلصولك الورق كله وانت تقعد على القهوة وتشرب كوباية شاى وطبعا كل حاجة ليها تمنها .. طبعا رفضنا فلقيت واحد منهم بيقولنا خلاص انت حر تبقى تقابلنى لو خلصت حاجة النهاردة وخليك واقف فى الطوابير .. طبعا طنشنا الكلام ده لانى كنت واثق ان الامور بعد ثورة 25 يناير اتغيرت والموظفين بقه عندهم ضمير اكتر من الاول وحيمشوا مصالح الناس بسرعة بس اتصدمت لما لقيت فى مرور السلام مفيش حاجة اتغيرت ولا كأن حصلت ثورة من الاساس وكان الى حيجننى اكتر ان الموظفين بتتعامل مع البلطجية ده وبياخدوا نسبة من الفلوس الى بياخدوها من الزبون طبعا .. طبعا مش كل الموظفين الا من رحم ربى لان فى ناس اشراف بينهم وميقبلوش على نفسهم قرش حرام .. ده حتى مهندس الفحص ما بيطلعش يفحص بنفسه ويخلى بلطجى هو الى يا خد منك العربية ويخلصهالك وبعد كده يقولك الحلاوة وما ادراك ما الحلاوة طبعا يضربلك مبلغ عالى 300 جنيه ولو قلتله انا حخلصها بنفسى يقولك انت فاكر ان المبلغ ده حاجة ده انا حاخده منك واوزعه والمهندس حياخد نسبة منه ولما تروح تفحص تلاقى فعلا كلامه صح والمهندس بيسيب البلطجية هما الى يخلصوا للناس فحصهم والباقى معروف .. المهم بعد طول عذاب ووقوف فى جميع الطوابير والانتظار الطويل جدا والعروض الى كل شوية تجيلك تحب اخلصلك الورق .. الرخصة طلعت بسلام وطبعا ده بفضل ربنا فى الاول ثم علشان كنا بنقسم نفسنا انا ووالدى على الطوابير علشان نخلص ونطلع الرخصة فى نفس اليوم
الخلاصة الواحد بيتمنى ان تكون الامور اتغيرت فى مرور السلام دلوقتى برغم ما عدش غير شهرين من يناير لمارس .. وان البلطجية دول الشرطة تمحيهم من على الوجود لان لولا تعامل الموظفين وامناء الشرطة مع البلطجية دول مكنش حيكون ليهم اى اثر .. لان الموظف بيعطل مصالح الناس علشان يجبرك انك تتعامل معاهم فى الاخر علشان يطلعله فلوس حرام فى الاخر يأكل بيها نفسه وعياله .. وربنا يهدينا جميعا
ياريت الكل يشارك ويحكيلنا المواقف الى حصلت معاه داخل المرور يمكن مع مرور الوقت نعمل موضوع احسن مرور فى مصر ونقارن بينهم جميعا
|
كلامك سليم مية في المية ونفس الكلام دة انا شوفتة اول مرة دحلت فيها المرور الزبالة دة
المشاركة الأصلية كتبت بواسطة zamanan2000
اولا احب اقدم تحياتى على الفكرة الحلوة
بص يا سيدى اسواء مرور اتعاملت معاه مرور السلام فعلا مالوش حل عدد الناس كتير جدا لانه شامل اجرة وملاكى ونقل وفى نفس الوقت اللى بيقدم الخدمة عدد قليل م الموظفين انا وقفت من 8 ونص الصبح لواحدة الضهر بس علشان اجيب براءة ذمة فتخيل بقى بقيت الاجراءات بتبقى ازاى
ده غير العدد المهول من النصابين اللى واقفين هناك اكتر من الناس
ولا الشمس تحس انها ملمومة كلها فى المرور ده لما كنت هفطس
|
صح كلامك وبتوع الشاي الى بيرغوا في ودنك وطوابير المخالفات الي جنبك ويخرجك تجيب بيان صرف لوحات بعد ما تكون وصلت للشباك وترجع تقف الطابور من الاول
المشاركة الأصلية كتبت بواسطة AboNoRa
مرور السلام هتكره اليوم اللى اشتريت فيه عربيه اصلا
|
انا كرهت العربية لمده شهرين لاني كنت مغير موتور ولفيت لفة محترمة هههههه
المشاركة الأصلية كتبت بواسطة herlom
انت حتقولى على مرور السلام ده اكتر مرور يكرهك انك تشترى عربية ولو اشترتها يندمك انك اشترتها ويكرهك فى حياتك اعوذ بالله
|
والله لو هتمشي بالطوابير والنظام يبقا عادي انما هما البلطجية بيشربوا حشيش عيني عينك والظابط الى هناك مش عارف يعمل معاهم حاجة ولا كمان العربيات الى بيأجروها عشان تعمل الرخص الخاصة
فعلا ازبل مرور على مستوى الجمهورية والىي يقول غير كدة يبقا ميعرفش يعني اية مرور السلام
المشاركة الأصلية كتبت بواسطة mr_astra
اسوا مرور بالنسبة لى مرور طنطا شوفت فية الويل الويل الويل الويل من هنا لغاية بعد بكرة بعدة مرور السنبلاوين ملحوظة انا اتعاملت مع مرور السلام كتير جدا جدا جدا واخرها فى شهر فبراير اللى عدى ......اقول اية دة حتة بسبوسة دة ولا اكنى فى امريكا بالنسبة لمرور طنطا على النقيد من احسن ادارات المرور اللى اتعاملت معاها مرور رابعة جددت ونقلت ملكية فى اقل من ساعة وبالمثل مرور الوايلى بجد ممكن تستاذن من شغلك تروح تجدد رخصة عربيتك وترجع شغلك تانى
|
على فكرة باين على حضرتك دخلت مرور السلام سنيما هههههههههه
ومرور رابعة مرور محترم ايوة يببقا زحمة انما بيخلص الناس علطول
وبالنسبة للوايلي مفيش وايلي بقا في مصر الجديدة لعلمك الخاص وبردة مرور محترم ومافيبهوش رشاوي غير بمزاجك
وشكر خاص لصاحب الفكرة وللمنتدي الرائع