خطوات نقل ملكيه سياره مستعمله من مرور الى أخر 2014
السلام عليكم
انا لسه مخلص الموضوع ده و حبيت أنقلكم الى حصل لتعم الفائده
1- بعد ما ربنا يكرمك و تشترى السياره و يكون معاك عقد مسجل و كل التوكيلات - ان وجد- و شهاده المخلفات و أيصال سداد الرسوم فى الشهر العقارى تروح للمرور الى تبع محل سكنك الى فى البطاقه هتروح تشترى كل أوراق الترخيص وهم 3 ورقات نموذج تجديد و نموذج فحص فنى ونموذج فحص بيئى وصل الطفايه
2- تروح لمهندس الفحص هياخد بصمه الموتور و رقم الساشيه و هيكتبلك على ظهر ورقه الفحص الفنى خطاب موجه للمرور الى العربيه مترخصه حاليا فيه يطلب منهم تأكيد بيانات العربيه فى الملف عندهم و يختمهولك
3-تاخد الجواب ده و تروح بيه مرور العربيه القديم لشباك تأكيد و مراجعه البيانات هينادى عسكرى يجبلك الملف بتاعك و بعدين هيرد عى الجواب فى نفس الورقه بأن البيانات سليمه و مطابقه للملف و ان الملف موجود و يختم
4- تروح لضابط المباحث الى فى نفس وحده المرور يعمل بحث أمنى ان السياره مش متبلغ عنها او مسروقه
5- تاخد الجواب و ترجع للمرور بتاعك و تروح للمهندس الفحص تانى هيكتب بيانات العربيه و ياخد بصمه الموتور و رقم الساشيه
و بعدين تكمل الأجرائات العاديه تدفع الرسوم والتأمين الأجبارى و تشترى طفايه او تجيب بتاعتك معالك يكتبلك انها صالحه
6- و تستلم رخصتك بعد كده و بتكون مؤقته تلت او سته شهور و بيتكتب عليها لحين ورود الملف و تيجى بعد كده لو الملف جيه يجددهالك ببقيه المده لو مجاش بجددهالك مؤقته تانى
7- اخر حاجه موضوع النمر لو المرور الى هتنقل فيه ماشى فى النمر ينفس طريقه المرور الى جاى منه مش هتحتاج تغير النمر
يعنى لو المرور القديم ماشى تلت حروف و تلت ارقام و الجديد نفس الكلام مش هتتغير النمر انما لو ولحد فيها مثلا اربع ارقام و التانى تلاته هتضطر تغير
الى فوق ده الكلام الرسمى :
الى حصل معايا الأتى:
1- رحت المرور الجديد " الزيتون" اشتريت كل الورق من الخزنه دخلت للمهندس قالى بالنص هات عشرين جنيه وكتبلى الجواب
2- رحت المرور القديم " البساتين" لقيت مالا يقل عن 3000 بني أدم و طوابير كتييييييييير خرجت سئلت بره المرور مين هنا بيخلص أجرائات جالى واحد كده شكله شمام خد منى الجواب و ادى للعسكرى 10 جنيه جاب الملف فى ثوانى و المهندس عشره جنيه تانيه مضالى الورقه من غير ميبص على الملف اصلا واديت للشمام عشرين جنيه
3- رحت لضابط المباحث قالى الكمبيوتر بايظ وراح مدينى قصقوصه ورق لضابط مباحث الأميريه .. عنايه فلان الفلانى صباح الخيرات رجاء الأستعلام شكرا و ختمهالى بأسمه
4- طلعت على قسم الأميريه قالى معندناش كمبيوتر أستعلام أصلا !!! و الحل يا حضره الأمين !!! قالى هات عشرين جنيه... وكتبلى وهو قاعد تم الأستعلام ونقل البيانات من الرخصه و ألف رقم موبايل صاحبه العربيه كمان معرفش ليه وختمها
5- رحت لمهندس التراخيص اديته الورقه و الرخصه ومدتوش فلوس زعل ... وقالى شكلك عايز تأنسنا شويه أديتو 10 جنيه كملى الورق ورق وقالى خد الطفايه و روح أختمها
6- رحت عند شباك التجديد اديتها الورق فاضى كله مش مترتب بصيتلى كده وقايتلى الورق فاضى اديتها 50 جنيه مليته كله وأديتنى أيصال اسدده فى الخزنه دفعت ورجعتهلها قاليتلى ارتاح و بعد 10 دقايق بضبط جابتلى الرخصه و جت
|