[Vanditta]

المشاركة الأصلية كتبت بواسطة الزيرو السلام عليكم كل اهل المنتدى يا رب تكونو بخير وصحة يا رب انا المرادى هتتقل هتتقل متزهقوش منى واستحملونى انا خايفة حد يضربنى بباب عربية ولا حاجة انا طماعنة فى كرمكم انا معايا 25000 الف بس يعنى عايزة عربية على ادى كده بس تكون كويسة وشفت حاجات سعرها فى الرينج ده او اقل شوية وعايزة معلومات شاملة عن كل وحدة بما فيها الاسعار والشكل وقطع الغيار واستهلاك البنزين بما انى مش من القاهرة ومن اسيوط وصعب اسافر مصر كل شوية لو حاجة باظت فى العربية فتكون يعنى قطع غيارها متوفرة فى اسيوط وايه احسن عربية واسوا عربية فيهم العربيات اللى شفتها هى ستارليت ابيزا 94 بونتو ستروين جيلى فروتة كيا برايد هاتشباك دايو ماتيز بس سمعت انها وحشة ومشاكلها كتير وكمان شكلها بصراحة مش عاجبنى ولو فى انواع تانية فى نفس الرينج يا ريت طبعا انتم اعلم وادرى منى انا معنديش اى معلومات خالص عن العربيات وبحاول اخد خلفية من النت وشوية شوية بتعلم

افضلهم اعتمادية وسهولة فى الصيانة وتوافر قطع الغيار ورخصها واقلهم استهلاك بنزين هى الكيا برايد العصفورة
والسعر اللى مع حضرتك يجيب واحدة بحالة جيدة جدا بدون تكييف
بالنسبة للعربيات التانية اللى حضرتك مقترحاهم
1- تويوتا ستارليت ...... بصراحة معرفش عنها حاجة
2-ابيزا 94 .... قطع غيارها غالية الى حد ما بس متوفرة - موتورها قوى -ثباتها كويس - شكلها شبابى وعصرى الى حد ما
بس السعر اللى مع حضرتك مايجيبش ابيزا ممتازة ..... ممكن يجيب ابيزا بدون تكييف بحالة مابين متوسطة وجيدة
3-البونتو ..... عربية ممتااااااازة فى كل شىء - يعيبها ان مش اى حد يشتغل فيها (صعبة شوية فى ميكانيكتها ) - قطع غيارها غالية ومش متوفرة اوى - السعر اللى مع حضرتك مايجيبش بونتو بحالة جيدة .... ممكن يجيب بونتو بابين بدون تكييف حالة مابين متوسط الى جيد
4-ستروين لو ال ax عربية حلوة وناس كتير بتشكر فيها بس الستروين عموما واخد سمعة سيئة فى السوق المصرى مش عارف لية - بالنسبة لقطع غيارها ماعرفش بصراحة متوفرة ولا لأ
السعر اللى مع حضرتك يجيب ax بحالة ممتازة ومكيفة
اما الستروين ال zx ماعرفش عنها حاجة
5- جيلى فروتة ...... لا تعليق

بالنسبة للمقترحات خارج الاختيارات الموجودة
1- سوزوكى سويفت بحالة جيدة (قطع غيار متوفرة وسعرها متوسط - استهلاك بنزين قليل -اعطال قليلة- عربية يابانى وتحترم)
2-هيونداى اكسيل بحالة متوسطة (قطع غيار متوفرة جدا ورخيصة-استهلاك بنزين متوسط -ثبات ضعيف -وصاج ضعيف-موتور قوى خصوصا ال 1500 )
3-ماروتى حالة ممتازة وموديل فوق ال 2000 (قطع غيار متوفرة ورخيصة - استهلاك بنزين قليل جدا - اعطال قليلة - بس يعيبها حجمها الصغير )