[عصام غنايم]

موضوع العزل او تكتيم السياره يعتبر من اهم المواضيع اللى كتبتها وناس كتيرطلبته منى وانا اتأخرت فيه شويه

بس ده لأنه موضوع مهم وكان لازم اعده اعداد جيد ليخرج بالصوره اللتى اتمنى ان تفيد كل من يقرأه

المهم

نبدا موضوعنا

بسم الله

ايه اكتر حاجه بتفرق بين سياره وأخرى غير ارقام الآداء ؟

جودة عزلها

يعنى ايه ؟

يعنى لو فرضنا انك روحت مشوار بسياره مرسيدس

وروحت نفس المشوار بسياره شاهين ( مثلاٌ )

هل احساسك بالطريق و الأصوات ودرجة الحراره هتبقى زى بعض ولا فى اختلاف ؟

اكيد فى اختلاف

المرسيدس هتسمع فيها صوت الهدوء حتى مع المطبات ومش هتحس بحرارة الجو

اما فى الشاهين هتحس انك راكب منخل وماسك فى ايدك شخشيخه و انت قاعد فى فرن بلدى

وهو ده فرق العزل

علشان كده هنحاول مع بعض نرفع مستوى عزل عربياتنا من مستوى ( السيارات ال ---- ) الى مستوى ( السيارات الآلمانى )



بسم الله

لما نيجى نبداء فى عزل اى سياره لازم نشتغل فى اتجاهين

1 العزل الخارجى

( تربيط عفشه - مراجعة الشكمان - تربيط مفصلات و كوالين الشنطه والكبوت - رش فجاواى وعتب السياره بالبلاك السائل )

2 العزل الداخلى

( تربيط مفصلات وكوالين الأبواب - عزل الأبواب بالارمافلكس - عزل ارضية وأجناب السياره بالارمافلكس - عزل التابلوه - حقن فوم سائل وجاف فى جميع فراغات صاج السياره )

كده احنا خلصنا الجزئ النظرى فى موضعنا



نخش بقى على الجزء العملى

بسم الله

الخامات اللى هنحتاجها بالترتيب

1 الفوم السائل

بنجيبه من محل بيع مستلزمات صيانة التلاجات تصنيع هولاندى او سويدى الأنبوبه ب 40 جنيه وبنحتاج اربع انابيب للسياره

ودى صورته




2 الفوم الجاف

وده اللى بيبقى فى ابواب التلاجات وبنجيبه من اى حد بيبيع مستلزمات تصليح التلاجات اللوح ب 20 جنيه تقريباٌ او من اى باب تلاجه قديمه ببلاش

ودى صورته




3 البلاك الرش الأيطالى

وده بنجيبه من محل مستلزمات بويات السيارات الأنبوبه ب 25 جنيه وهنحتاج انبوبتين للسياره

ودى صورته




4 البلاك اللصق الأيطالى

وده بنجيبه من محلات مستلزمات بويات السيارات الفرخ ب 50 جنيه




5 بكرة لاصق ابيض ورقى عريض

من عند محلات بويات السيارات هنحتاج بكره بخمسه جنيه


6 الارما فليكس

وده بنجيبه من محلات بيع قطع غيار التلاجات وده بيستخدم فى عزل غرف التبريد الكبيره لتلاجات الفاكهه والخضار وده بيبقى تخانات مختلفه ( 2 , 4 , 6 )مم وطبعاٌ كل تخانه ليها سعر هنشتغل بتخانة 4 مم ودى سعر المتر فى متر 17 جنيه


معانا ادواتنا نبداء الشغل بقى


العزل الخارجى


1 تربيط العفشه

طبعاٌ العفشه تكون سليمه فى الأساس ( ميبقاش فيها مساعد ضارب ولا جلبه مبوشه ) لأن الحاجات دى اكيد هتعمل اصوات مستديمه احنا فى غنا عنها

هنروح اى مركز صيانه نرفع العربيه ونمر على كل مسمار فى بطن العربيه ونربطه كويس

على فكره الصوره دى فى مركز الباشمهندس اسلام زميلنا فى المنتدى بالمنصوره





بعد التربيط هنمر على كل مفصلات العفشه الكاوتش ونرشها زيت لتليين العفشه


2 الشكمان

والعربيه مرفوعه هنمسك الشكمان بأيدنا وهو بارد وهنهزه فى حدود حركته الى يمين ويسار وكمان الى الامام والخلف



المفروض ميخبطش فى اى حاجه وميعملش صوت كمان طبعاٌ لو فيه اى مصدر صوت بنحدد مصدره ونعالجه


3 تزبيط الشنطه

هنيجى للشنطه ونفتحها ونقفله تانى المفروض يكون صوت قفلتها مكتوم طيب لو بتشخشخ نعمل ايه ؟

1 هنفك النمره ونلزقها من ورا بدبل فيس ونربطها تانى كويس

2 هنزيت كالون الشنطه ومفصلاتها واسياخها

3 للشنطه صدادات كاوتش بتحدد قفلت الشنطه بنظبط ارتفاعها لأنها بتبقى لازقه
غطاء الشنطه فى جسم السياره عند غلق الشنطه ودى اهم حاجه فى زبطة الشنطه

4 هنحقن فراغ الشنطه اللى بين الصاج الداخلى والخارجى بفوم سائل





4 تزبيط الكابوت

1 هنزيت مفصالات وكالون الكابوت

2 هنعيد على رباط الشبكه

3 هنزبط صدادات الكابوت الكاوتش انه يقفل مكتوم وفى نفس الوقت يكون ملاصق
ليهم ويكون ماشى مع اعلى نقطه من الرفرفين





4 هنفك اللباد الأسود الخاص بالكابوت ( اللى معندوش يشتريه من اى تاجر استعمال ويركبه ) ونحقن فراغات عضم الكابوت بالفوم السائل

مع مراعاة رفع الكابوت على خشبه من نصفه بالظبط قبل الحقن علشان ميتفتلش





5 رش الفجاوى وعتب السياره

هنغسل العربيه من تحت غسله كويسه اوى وبعدين وهى جافه
هنروح لأى بوهيجى ونرفع العربيه بعد ما نحل الأربع فرد
وهنسنفر باطن الفجاوى الأربعه بسنفره خشنه ونضفهم كويس اوى





هنلصق اجناب ووش العربيه بالجرايد علشان مياخدوش دهان





هنلزق اجزاء العفشه من جوه بالجرايد برده علشان متاخدش دهان





هنجيب خرطوشة البلاك الرش الأيطالى ونركبها على مسدس البوهيجى ونرش الفجاوى والعتب من تحت للسياره اجمالاٌ طبقه تقيله وبعدين نسيبها تجف
بعد ما تجف نرش طبقه تانيه تقيله ونتركها تجف غالباٌ هتبيتها عند البوهيجى علشان الرش يعضم قبل ما تحرك العربيه




[SIZE="5"]
طبعاٌ كل ما سبق مينفعش يكون فى وجود اى بارومه فى بطن العربيه ( ولو موجوده ننضفها اول )

وبكده نكون خلصنا الجزء الأول العزل الخارجى فى السياره