[dego_story]

المشاركة الأصلية كتبت بواسطة خالدخليفة نكمل دى حكاية شبه اللى فاتت مرة مسافر اسكندرية وركبت قطار 10 ونص بالليل وكنت حاجز فى الدرجة الأولى والدرجة الاولى دى عبارة عن كرسى واحد على اليمين وكرسيين على الشمال او العكس ولانى مش بعرف انا م فى القطار مهما كنت مرهق فركنت دماغى وقفلت عينى لكن سامع وحاسس بكل حاجة حواليا وكان على شمالى راجل ومراته وبنته لفو الكراسى وقاعدين بيتكلمو مع بعض وسمعت حديث غريب خلى نافوخى سخن جدا وفوقنى لكن وبصراحة مفتحتش عينى وعملت نايم الاب / بكرة ننزل شارع فرنسا نجيب الدهب (لمن هم من خارج اسكندرية ده زى الصاغة فى القاهرة كله محلات دهب) البنت / شارع فرنسا ده ايه يادادى انا هجيب الدهب من سويسرا الام / والله عندك حق هنا بقى كله مضروب الاب / طيب بكرة نروح نجيب العفش من دمياط البنت / دمياط ايه المعفنين دول يادادى احنا هنجيب العفش من ايطاليا الا م / شغلهم مش حلو ياراجل مفيش احسن من ايطاليا بلد الموبيليا الاب / طيب ننزل نجيب الاجهزة الكهربائية من زهران (اعتقد وكيل براون فى مصر ) البنت / يابابا ياحبيبى (معرفش مقالتش دادى ليه) هننزل فرنسا نجيب الاجهزة من هناك الاب بغيظ / يبقى بكرة نجيب الستاير والمفروشات فالبنت قالت / احنا هنجيب الستاير والمفروشات واللانجيرى (الاندر وير الحريمى) من اسبانيا (اول مره اعرف ان اسبانيا متخصصة فى الكلام ده) فقال / ليه وهو ماردينى كفر فقالت / انا مجيبش حاجة من هنا انت عايز الشلة والعيلة يقولو علينا بخلا وبنوفر فقال وتقريبا هو قرب يطلع دخان من دماغه / وان شاء الله مين هيروح الرحلة دى فقالت / ريح نفسك ياحبيبى (لاقالت دادى ولا بابا )هنروح انا وماما وخطيبى وطنط (حماتها) وانا توقعت انه يرميهم من القطار او يعمل اى منظر وفوجئت بيه سكت بعد م قال/ خلاص انتى حرة اعملى اللى انتى عايزاه وطبعا بنته قامت ادته بوسه وشكرا يابابا ياحبيبى وانا نافوخى سخن بصراحة ايه السفه ده دهب من سويسرا ودمياط اساتذة الموبيليا معفنين وشوية ستاير من اسبانيا واجهزة من فرنسا و4 افراد مسافرين 5 دول (جمع دولة) تقريبا هيصرفو كام من اقامة واكل وشرب وتنقلات غير شحن العفش من كل دولة ده تكاليف الرحلة دى تجوزشباب بلدنا والبلاد المجاورة كلها المهم اظرف مافى الموضوع سافرت البلد بعدها باسبوع وقابلت خال من اخوالى وده عامل زى حالاتى مبيسكتش بس صعيدى سريع الطلقات فرد وقال / وانت سمعت الكلام ده كله فقلت/ ايوه وعملت ايه هعمل ايه يعنى موضوع ميخصنيش ولو اتدخلت هسمع كلام ملوش لازمة فقال / اتسدج(تصدق)بالله ياابو اختو(ياابن اختى / هو ابن عم والدتى) فقلت / لااله الا الله فقال /انا كنت مسافر فى الجطر(القطار)عنجضى (اقضى) مصلحة ف طنطا وجابلت (قابلت) راجل ومرته(مراته) وهيا مصرة تصيف وهو يجول(يقول) ممعناش فلوس نصيف وتجول اتصرف وبصراحة ياابو اختو صعب عليا الراجل فقلت له / وعملت ايه فقال /مسكت المرة (المرأة) هزجتها(هزئتها) وجلت (قلت) حرام عليكى ارحمى الراجل هيجيب لك منين تصيفى اتلومى (كلمة صعيدى معناها لومى نفسك) ياولية احسن طلاج (طلاق) تلاتة ارميكى من الجطر وجوزها اتدخل وجال (قال) وانت مالك فجلت وانا مالى ازاى ياراجل ياخنتة (مخنث) (يعنى مش راجل) مجادرش(مش قادر) تحكم على مرتك فقلت له / وحصل ايه فقال / فضلت نهزج (أهزق من التهزيق )فيهم من طنطا لمصر( للقاهرة ) فقلت / ايه ده معقول ؟؟؟؟ فقال / والله ياابو اختو لحد مصر وهو نازل جلت له غور ياكش (اياك) اشوفك تانى والله هموتك المرة الجاية ضحكنى وقلت له بصراحة بتوع تجهيز العروسة من خارج مصر دول كانو عايزينك فقال / والله يابو اختو ده انا دمى اتحرج (اتحرق) ولو جاعد (قاعد) جنبيهم كنت رميتهم كلهم من الجطر فانا ضحكت وقلت ف سرى الحمد لله انك مكنتش معاهم حكم انا عارفك فئرى وتعملها

ايه ياحج خالد .. حراااااااااااااااام دهب من سويسرا ليه يعنى هيفرق ايه .. وايه الدول اللى بيرحو يعملو منها شوبينج دى .. دى الدول دى من خيالات الاحلام السفر ليها كدة لمجرد الفسحه .. ^_^ كتير وربنا .. وانا اللى كنت داخل اقولك شوفلى شغله ههههههههههههههههههههههههه هههه ^_^ لالالا انا عايزك ياحج خالد. تشوفلى عيله من العائلات دى .. وتجيلى عنوانهم ههههههههههههههههه.. ربنا يكرمك على الحكايات الممتعه دى للاسف انا مش بدخل المنتدى من فترة طويله جدااااا بس الموضوع دا اكتر من رائع ياحج خالد ...