ماذا تفعل عند شراء اوبل مستعمله ؟
اولا : زي اي عربيه مستعمله , تأكد ان شاسيه العربيه سليم , ارفع العربيه و شوف السلاحين قدام و ورا , و ان مفيش باروما عند الكرتيرات قدام و ورا , و حوالين الباكتات في السقف و عند الزجاج و شيل الاستبن و بص تحتيه
ثانيا : الموتور , ارفع مقاس الزيت و شوف لونه , لو الزيت لونه اسود و ريحته شايطه يبقي صاحبها مهمل في تغيير الزيت و يبقي اكيد حاله الموتور مش ولابد , دور الموتور و اسمع صوته , دوس بنزين شويه و اسمع اي صوت خشونه او تكتكه
بص علي الموتور من الجنبين و قدام ,في تسرب زيت من اي جزء ؟ , لو الموتور شكله لسه مغسول قريب يبقه في حاجه بتسرب و صاحب العربيه غاسل الموتور عشان متبنش
ثالثا : الفتيس الاوتوماتيك , ارفع مقاس الويت بتاع الفتيس و شوف لون الزيت علي المقاس , لونه الطبيعي احمر داكن , لو لونه اسود و ريحته شايطه يبقي الفتيس بيودع
خد لفه طويله بالعربيه و شوف الغيارات ناعمه و سلسه و لا في دب و رزع , و بعدين اقف و هات مارشدير , لو في دبه يبقي الفتيس بايظ
رابعا : التكييف , ببساطه لو مش شغال يبقي اعمل حسابك في 3000 جنيه عشان تشغله مهما قالك صاحب العربيه , لو شغال ضعيف برضه حيكلفك
خامسا : العفشه , خد لفه في طريق مكسر شويه و اسمع اي صوت مش طبيعي , خد مطب و شوف العربيه ماسكه نفسها ولا بتتهبد , اي صوت قدام غالبا بيكون بطاحات , ورا بيكون طقم جلب بالنسبه للفيكترا B
سادسا : الكهرباء , افتح كونتاك و شوف لمبه check engine شغاله ولا لا في ناس بتلغيها لما يكون في مشكله , دور الموتور شوفها طفت ولا لا
دي حاجات استرشاديه بس قبل ما تقرر تشتري , لاكن برضه لازم تكشف عند مركز متخصص يعني لو لقيت الحاجات دي كويسه يبقي العربيه تستاهل تكشف عليها عند حد متخصص
|