هيونداي النترا2012 في الكويت - مواصفات وأسعار وضمانها الأكثر من رائع وممتاز
السلام عليكم ورحمة الله وبركاته
أنا هاكلمكم النهارده عن هيونداي النترا2012 الموجوده في الكويت(وأنا مقيم في الكويت)
رحت التوكيل من اسبوع كده هنا في الكويت وسالت عن هيونداي النترا2012 وقالي أستاذ عماد(تقريبا المصري الوحيد اللي في هيونداي في الكويت) -مسئول المبيعات- ان النترا ليها ثلاث فئات بس في الكويت:
1- الفئة البيسك أو ستاندارد ودي اللي مش فيها مواصفات وتحتوي علي طاسات15 وطارة دريكسيون متعددة الاستخدامات واتنين ريموت كنترول وتكييف يدوي. ودي سعرها 4200 دينار كويتي يعني تقريبا 90 ألف جنيه مصري.
2- فئة النص فل: ودي فيها رنجات الومنيوم 16 انش وفرامل مانعه للإنزلاق وفتحة سقف ولمبات ضباب واشارات علي المرايا وطارة دريكسيون متعددة الاستخدامات واتنين ريموت كنترول وكمان فرش العربيه ذو جوده مختلفه عن الفئة البيسك.ودي سعرها4700دينار كويتي يعني تقريبا 100 ألف جنيه مصري.
3- فئة فولي لوددFully Loaded ودي فيها كل المواصفات اللي ممكن تتخيلها زي الكاميرا الخلفيه والحساسات والدي في دي وسبعه ايرباج ورنجات 17 انش ونظام البصمه وتشغيل السياره بدون مفتاح وطارة جلد وكراسي جلد بالكامل وفيها نظام تدفئة الكراسي وحاجات تانيه كتير ودي سعرها تقريبا5450 دينار كويتي(مبالغ فيه أوي) يعني تقريبا 117 ألف جنيه مصري.
نيجي للضمان بقي يا جماعه ومش هاتصدقوني في كلامي
هيونداي الكويت عامله ضمان مدي الحياه(عداد مفتوح)علي الماكينه والفتيس(أسمه في الكويت الجير)والكهرباء والتكييف.رااااااااااااااا اااااااااااائع لكن بشرطين إن العربيه تفضل بإسمك والشرط التاني هو الصيانه الدوريه في التوكيل كل 5000 كيلو
وأنا برضو سالت في أسعار الصيانه وقالولي الخمسات بحوالي 200 جنيه لحد العشرين الف كيلو يبقي بحوالي من 600 لـ800 جنيه والأربعين ألف بحوالي 1200 لـ1600 جنيه والستين الف بحوالي 2000 جنيه.هي دي شروطهم.
الصيانه كده تستاهل فعلا الضمان مدي الحياة وفعلا مبالغ في الأسعار أوي
وأسف علي الإطاله يا جماعه.وأي استفسار أنا جاهز للرد
الموضوع حصري لمنتدي مصر موتورز.
|