[Felefel Ahmed]

السلام عليكم
انا لقيت ان حيره التجنيط لأي سياره والندم بعد ما نجنط سمه عامه لكل الناس وانا مريت بيها طبعا من 15 سنه
هنمسك الموضوع واحده واحده كالتالي

- ما هو الجنط ؟
- ما هي ارقام 17/50/195 عند التجنيط ؟
- كيف أختار الجنط الجديد؟
- ما هي أهم الأعدادات قبل تركيب الجنط؟
- كيفيه صيانه الجنط؟
- كيفيه تصليحه؟
بسم الله نبدأ بالترتيب

- الجنط هو قطعه المعدن المدوره أللي بيركب عليها الكاوتش
نيجي للأرقام
الجنط رقمين بس (قطر الجنظ/ عرض الجنط)
الكاوتش ثلاثه أرقام (قطر الجنط / عرض الجنط / أرتفاع من الأرض للجنط)
ال R من 13 و 14 و 15 و 16 ده قطر الجنط (الحديد)
ال 50 و 55, 60, 65,70, 75 ........ده علو الكاوتش يعني من الأرض للجنط
ال 165و 175, 185 , 195 , 205و 215 ده عرض الكاوتش

- كيفيه أختيار الجنط ؟
1) أختيار ال R و الأرتفاع
لازم قطر الجنط الأصلي بالكاوتش = قطر الجنط بالكاوتش (فيه سماح بسيط)
علشان لفه العجله علي الأرض متخلفش السرعه مع عداد السرعه للعربيه يعنى لو الجنط الجديد بالكاوتش قطره أصغر من الفبريكه سرعه السياره هتكون اعلي من سرعه العداد امامك (العربيه سرعه 120 وأنت شايف ادامك علي العداد 105 مثلا) والعكس صحيح
كمان علشان لو بقا أكبر ممكن يحك في الكرتيره والرفرف من تحت فى الملفات

يعني لو الجنط الأصلي R13 والارتفاع 85
لما تيجي تجنط هتكبر قطر الجنط مثلا ل R14 يبقا غصب عنك لازم تنزل الأرتفاع ل 75 حتي 65 أخرك لو R15 يبقي 55 أو 50

2) وزن الجنط
وزن الجنط الفبريكه يفضل ان الجديد يساويه أو يزيد قليل جدا (من الجنط من جوه هتلاقى الوزن بتاعه) طبعا لو تقيل أوي هيقطم المسامير اللي طالعه من الطنبور أو هيلوح الصوره مع مطب جامد

3) تحميل الجنط
لا تعتمد علي الشكل فقط يعني لو عجبك شكل النجمه ال 5 أو 8 لازم تكون اصابع النجمه محمله مش منظر علي الفاضى (انت هتمشى بيه في مصر)

4) عرض الجنط
ديه بالنظر علشان ميحكش فى الرفرف مع المطباط والحمل يعني فيرنا أخرها 185 وممكن 195 بس هيحك ورا لو فيه حمل , لانسر 205

كده احنا عرفنا مقاس الجنط الجديد بدون الضرر بالسياره

قبل ما نتوكل علي الله وننزل نشوف الأشكال فى السوق لازم نظبط شويه حاجات علشان منضيعش تعبنا

- ما هي أهم الأعدادات قبل تركيب الجنط؟
1) الرينجات
كل ما الجنط تكبره هتكون مضطر تقلل ارتفاع الكاوتش وتحس أكتر بالمطبات فى الشارع + قلب الصره الأصلي للسياره لازم يكون فيه بوش (فراغ) مع الجنط الجديد
الحل سهل تركب رينجات , وديه بتركب علي قلب الصره اللي بين المسامير
ممكن صنيعي يحاول يقنعك انها ملهاش لازمه علشان هو مش فاهم , سيبك منه واشتريها بنوع السياره
بنكون زي الحلقه كده وبتركب باليد عادي

طبعا اوعا تركب النوع الحديد أو البلاستيك لازم تركب اللي مصنوع من ماده ما بين الكاوتش والبلاستيك
امسكها بأيدك هتعرف , اصل مش معقول تقلل بوش الجنط بحديد تحتيه

2) مسامير الجنط
المسامير ديه اللي بيركب عليها الجنط
يفضل تغيرها لمسامير وصواميل سبورت (تتحمل أكتر)
ممكن متغيرش عادي (هما مبيعملوش )

كده احنا تمام ومستعدين نشتري الجنط

- كيفيه صيانه الجنط؟
الموضوع بسيط جدا , اوعا تمشي والكاوتش نايم شويه
وكل ما يكون ارتفاع الكاوتش اقل يكون الجنط عرضه للخبط
ببساطه مطبب زاويه قائمه يعني حفره يخلي عزم العربيه كله علي الجنط لان الكاوتش نايم شويه فتلاقي الكاوتش فيه بلونه من الخارج (طبعا ملوش تصليح أرمي يا باشا)

يا رب أكون افدتكم ولو بمعلومه بسيطه