[adham.com]

السلام عليكم و رحمة الله و بركاته
كل عام و أنتم بخير و صحة و سلامة

أعتذر عن التأخير الشديد في الرد برغم إني شوفت الموضوع من بدايته .. لأني كنت بتابع من (الموبايل إنترنت)


مبدأيا كدة فكرة جهاز ماس دة ما هو إلا كووووووندنسر بس علي كبير شوية
سيبك من الكلام بتاع التسويق (بيوفر بنزين - بيخلي العربية تدور من أول تكة - بيخلي سحب العربية أفضل)
كل دة كلام تسويق .. لكن الواقع دة كوندنسررررررررررررررر كبير

طريقة التركيب

* إخلع السلك الواصل بين الأسبراتير و الموبينة (خليه معاك في درج التابلوه)
* جهاز ماس خارج منه أربع أطراف (أحمر - أخضر - أسود - أبيض)

الطرف الأخضر توصله في (سالب -) الموبينة ... إلي إنت خلعت منه السلك إللي كان واصل بالإسبراتير
الطرف الأحمر توصله في (موجب +) الموبينة
الطرف الأسود توصله في الأبلتين .. مكان السلك إللي إنت خلعته القديم
الطرف الأبيض توصله تحت الموبينة و تخليه ملامس جيدا لجسم العربية (الأرضي)

تربط كل الأطراف جيدا في أماكنها و تعزل بشريط لحام ... و يفضل طبعا إنك تعمل كلبسات لكل طرف


إخلع الكوندنسر خالص من الأسبراتير و خليه في درج التابلوه

إنتهيت من التركيب .. تتوكل علي الله و تدور العربية

----------------------------------------------------------------
تجربتي مع هذا الجهاز مع الأسف كانت تجربة لمدة إسبوع فقط
----------------------------------------------------------------

إشتريت الجهاز من الأستاذ محمد موسي و تم تركيبه و العربية كانت تمام التمام لمدة سبعة إيام
و فجأة في اليوم الثامن كنت جاي من مشوار و ركنت العربية أودام باب جراش بيتي و بطلتها و دخلت افتح الباب
جيت أدور تاني لقيت العربية مش عايزة تدور (استمرت محاولات التدوير ربع ساعة) و في الأخر زقيت العربية
و ركنتها في الجراش
جيت تاني يوم صباحا قولت يمكن عشان العربية كانت سوخنة ... ديلوقتي أهيه بادره لما أدور
حاولت لمدة ساعة تدوير و للأسف (((( مفيش )))) .. المارش تمام و البطارية تمام
نزلت أشتريت موبينة إلكتروني و أبلتين جديد و ركبتهم ... و برده (((( مفيش ))))

قولت طب أخلع جهاز ماس و أرجع الكوندنسر تاني .... و كانت المفاجأة إن العربية دارت

قولت طب أركب الموبينة القديمة و الأبلتين القديم مع الكوندنسر و لقيت العربية بتدور زي الفل

و هنا بقي إكتشفت إن جهاز ماس بقي في الــــ(( باي باي ))
إتصلت بالأستاذ محمد موسي و شرحتله الموضوع
حسسني إن عربيتي فيها مشكلة و قعد يقوللي إصل العربيات القديمة فيها مشاكل
و أصل عربيتي بتهرب كهربا .... و أصل عربيتي فيها حاجة ملمسة

و أنا أقنع فيه و أقوله يا عم الحج أنا حطيت الكوندنسر القديم و العربية بقت تمام .. مش عايز يقتنع


قولتله من ألخر كدة يا باشا .... الجهاز دة حضرتك ينفع تغيره ... قاللي أصل الشركة بتدي ضمان 3 سنين عليه .... قولتله يا باشا أنا بكلم حضرتك مش الشركة .. هل ينفع يتبدل ... قاللي لاء أنا مش بدي عليه ضمان .. و أنا بايع 700 حتة من الجهاز و محدش إشتكي ... قولتله يا باشا كلامك صحيح و أنا مصدقك و لكن أي منتج في الدنيا مهما كانت جودته و كفائته .. لابد من وجود نسبة مرتجع و عيوب صناعه


قولتله بقول حضرتك إيه من الأخر كدة .... لو حد سألني بصفتي أدمن لأحدي جروبات الفيس البوك و قاللي الجهاز حلو و لا لاء .. تحب اقوله أنه جهاز سيء و أحكي تجربتي و أقول إن الجهاز بدون ضمان ؟؟؟؟؟؟؟؟؟؟

رد و قاللي خلاص يا أستاذ أدهم هات الجهاز و أنا هبدلهولك .... بس هو مش مقتنع حتي الأن إن الجهاز فيه مشكلة

و عموما بعد العيد بمشيئة الله لو لينا نصيب هروحله الهرم مخصوص عشان أغير الجهاز دة .. مع إني نفسيا قفلت من الجهاز خلاص


و بعتذر جدا عن كتابة هذه التجربة .. كنت أتمني إن الجهاز دة يكون نسبة الشكاوي منه (((صفر%)))
و أنا ماقصدش أني أسيء للأستاذ محمد موسي ... هو راجل محترم جدا و لكن موضوع الضمان مهم جدا حتي و لو لفترة شهر مثلا


نصيحة هكررها تاااااااااااااااااني

خلي معاك كذا كوندنسر إحتياطي في درج التابلوه
و خلي معاك السلكة الواصلة بين الأسبراتير و الموبينة
لحين الحاجة إليهم