رجاء وطلب اذن من اعضاء قسم الثورة
اعزائى اعضاء مصرموتورز وبالاخص جميع المشاركين فى قسم ثورة يناير
القسم ده اتعمل بروح ثورة يناير وسجل كل احداثها على مدى السنين اللى فاتت وبالتالى قيمته فى قلوبنا وذاكرتنا كبيرة جداً علشان كدة عايزين نحافظ علي القيمة ديه قدر الامكان ونزودها كمان
ومن الملاحظ فى الفترة الاخيرة تعرض القسم لنوع من الاغراق بالموضوعات الردود المكررة عن نفس الاحداث او التوجهات السياسية وده بيختصر القسم من مكان اتعمل لحلم الثورة ومتابعة احداثها لمكان لتبادل الاتهامات والتخوين مابين مختلف الفصائل
من ناحية واقعية ده فعلاً حال الثورة دلوقتى اللى وصلناله والطبيعى ان القسم يعكس الواقع
لكن من ناحية تانية بقى شىء يبعث على الاكتئاب لما الواحد يخش القسم يلاقيه كله موضوعات من النوع ده ومكررة كمان
علشان كدة برجو منكم وبطلب اذنكم فى البداء فى ارشفة محتوى القسم اسوه بباقى الاقسام فى اطار عملية الارشفة الدورية اللى بنقوم بيها سنوياً
يعنى ايه ارشفه
يعنى هيتم دمج الموضوعات ذات الصله والخاصة بكل توجه مع بعض
مع الحفاظ على كل موضوع وكل مشاركة وكل رأى فى القسم
طيب ايه نتائجها ومميزاتها او عيوبها
اللى بيحصل مثلاً ان فيه عضوين كاتبين موضوعين عن احداث محمد محمود 2 مثلاً
فهيتم دمج الموضوعين او لو فيه اكتر فى موضوع واحد شامل عن الاحداث ديه
هنحاول نختار اسم للموضوع المجمع يصف الحدث بشكل حيادى وموضوعى
وهيترتب الموضوع بحسب التاريخ وتسلسل الاحداث
فمثلاً لو نرجع لبداية الثورة كان فيه موضوعات كتير جداً اتعملت فى الفترة من 24 يناير ولحد قطع الانترنت
اللى حصل ان الموضوعات ديه كلها اتجمعت فى موضوع واحد بقى واحد من اكبر واهم ارشيفات الثورة على الانترنت وشمل كل مشاركات وموضوعات الاعضاء عن نفس الاحداث وبتسلل المشاركات الحقيقى وبكدة نقدر دلوقتى نفتح الموضوع ونشوف تطور الاحداث تباعاً بشكل افضل وبدون توهان او لخبطة
وبالرغم من ان ديه مش اول عملية ارشفه تتم سواء فى الاقسام العادية او فى القسم ده لكن وجب التنويه وطلب الاذن منكم تقديراً لكم جميعاً باختلاف ارائكم وتوجهاتكم السياسية
ديه كل الحكاية
وفى انتظار ارائكم واقتراحتكم طبعاً
وشكراً
وائل صلاح الدين
مسئول الدعم الفنى للمنتدى
__________________
اخر موضوعاتى
قريباً تقرير وتجربة اداء دايهاتسو تريوس * تويوتا راش
|