يا جماعه اسمحولى اوضح نقطه
طبعا احنا عارفين ان وظيفة الزيت انه يزيت الأماكن المتحركه فى المحرك للحفاظ عليها من التآكل
وعلشان الزيت يوصل لكل الأماكن المتحركه دى بيبقى ليه مسارات يمر منها علشان يدور الدوره بتاعته ويرجع لمكانه تانى وهكذا
ده بالأضافه لأن اماكن زى ال السلندر من الداخل بيحتاج طبقة زيت علشان البستم يتحرك للأعلى وللأسفل بحرية ( المسافه الضيقه قوى الى ما بين السليندر من الداخل والبستم دى هنسميها خلوص )
الخلوص ده بيختلف من شركة لأخرى ومن موتور لموتور آخر
الشركه صانعة الموتور لما بتحدد لزوجة الزيت المناسبه للموتور بتاعها
بتحدده بناء على عوامل كتير منها الخلوص ده قد ايه والممرات بتاعة الزيت عامله ازاى وده طبعا علشان تضمن وصول الزيت لكل الأماكن دى بسهوله سواء كان المحرك بارد او ساخن
لما نيجى احنا ونغير اللزوجه للأعلى ( نستخدم زيت اتقل ) زى ما هو الحال مع مصر1 الموتور بيعانى
بيعانى ليه ؟؟؟
الموضوع عامل زى كوبايتين واحده مليانه ميه والتانيه مليانه عسل وانا طالب منك تدور المعلقه فى كل كبايه 100 مره فى الدقيقه
هل المجهود العضلى المطلوب منك واحد فى الحالتين ؟؟؟
بيعانى والمحرك بارد لأنه طالب لزوجة 10W علشان يبدأ يشتغل وانت مديله زيت تقيل 20W
النتيجه ان الزيت مش بيوصل لكل الأماكن بالسرعه الازمه فبالتالى الأحتكاك اعلى ( فى بداية التشغيل فقط )
وبعد كده مطلوب من الموتور مجهود اعلى وبنزين اكتر علشان يقوم بنفس الوظيفه ( نفس عدد الدورات فى الدقيقه )
كمان النتيجه ان الأماكن الضيقه زى الخلوصات الى اتكلمنا عنها بتبدأ توسع مع الوقت علشان تعدى الزيت التقيل
وشويه شويه وتلاقى دخنه وشويه شويه تلاقى نفسك داخل فى طقم شنبر
نفس الموضوع بيتم و المحرك ساخن هو طالب 40W وانت مديله 50W
التوكيل مش من حقه يغير مواصفات الزيت لأن التوكيل ما اخترعش موتور جديد
فقط الشركه المصنعه للموتور هى صاحبة الحق فى تحديد مواصفات الزيت المناسب لمحركها
آسف على الإطاله
وتقبلوا تحياتى