[adham.com]

المشاركة الأصلية كتبت بواسطة ahrambc بلا جدال عمل فنى و تقنى متكامل يستحق أن يرفع له القبعه بكل احترام يحتاج لبعض الشرح و الأيضاح و ربما كان من الأفضل لو تم تقسيمه لأجزاء اكثر ليتوفر وقت للشرح و زيادة تفاصيل العمل خالص التحية و التقدير

مشكوووووووووور يا باشا عالرد و المرور
للأسف انا كنت مجبر بوقت الفيديو لأن كثير من الناس كانت معترضة علي وقت الفيديوهات
و لكن ضبط التاكيهات محتاجة حلقة منفصلة تماما عشان الشرح فيها يكون تفصيلي و مفهوم للجميع
و دة بحاول أعمله تجهيز قبل البدء في التنفيذ ... يعني محتاج عمود تاكيهات مستعمل عشان اشرح عليه برده و عشان الناس تقدر تفهم الفكرة من جذورها (يعني إيه ضبط تاكيهات) .. و طبعا محتاج فيديو كرتوني لحركة عمود التاكيهات و حركة عمود الكامة عشان يقدر يساعد الناس علي الفهم السريع للموضوع
بجانب طبعا التنفيذ العملي علي عربيتي

المشاركة الأصلية كتبت بواسطة zing0 و الله كنت مستنى الجزء الثانى بفارغ الصبر و كل شوية أدخل عاليوتيوب و أدور لاقيت الفيديو نزل و طبعاً نزلته و بأعلى جوده و قعدت اتفرج و أنا فاتح بقى عالآخر و عمال أدعى و أقول الله أكبر و ما شاء الله خايف تتحسد منى أو من حد من الإخوه دون قصد طبعاً (عمل الشيطان فى نفس الإنسان) المهم و أنا قاعد أتفرج, الحاج جه و بص عالفيديو معايا, لاقيته بيقولى ده فى أوروبا الكلام ده, قولتله ده واحد زميلنا فى المنتدى, مصرى يعنى. لاقيته أتشد أوى للفيديو و فى الآخر ما شاء الله التقفيل و لا شركة فيات نفسها. بس أنا أول مره أعرف أنك غسلت و نضفت الموتور, و الله العظيم و بلا أى شك قولت أنك نزلت إشتريت كله جديد من الأول. و حسيت فى الجزء الثانى إن المكنه غير بتاعة الجزء الأول خالص. رووووووووووووعه بجد ربنا يحفظك و يزدك علم و صحة و تشتغل أكتر و مستنيين المزيد أوعى تكسل.

ربنا يباركلك و يخليك يا باشا أنا متشكر جدا عالرد و الكلام الجميل دة تسلم يا باشا
بالفعل التنظيف خد مني مجهود كبير ووقت إسبوع تقريبا في التنظيف فقط
دة غير طبعا الدهان خد وقت برده و عقبال ما البوية نشفت برده و خدت كذا وش (3 وشوش)

المشاركة الأصلية كتبت بواسطة momen_bondok ماشاء الله ربنا يبارك فيك يا بشمهندس أدهم برغم إنى معايا 128 لكن موضوعك غاية الروعة

الله يباركلك يا باشا
و علي فكرة مواتير ال 128 قريبة في الفكرة من مواتير ال127 مع شوية إختلافات
سواء في سير الكتينة أو في وضع الدينامو و حاجات تانية لا أتذكرها الأن

المشاركة الأصلية كتبت بواسطة أيمن الروبي الله اكبر بسم الله ماشاء الله السكوت افضل تعليق

ربنا يخليك يا استاذ ايمن و مشكور عالرد الجميل

المشاركة الأصلية كتبت بواسطة sasao تسلم ايدك يا باشا على الشرح والمعلومات ومجهودك لكن انا اتفق مع الاخ محمد صالح انك عندك خبره كبيرة وانك عندك صبر كبير واكيد كنت اشتغالت فى المهنه قبل كده تسلم ايدك يا كبيــــــــــــــــــــــ ـــــــــــــــــــــــــ ـــــــــــــــــــــــــ ـر

تسلم يا باشا و مشكور عالرد و المرور
بصراحة ماكدبش عليك
الفيديو يبين إن انا عندي خبرة
و لكن في الواقع الحقيقي إن هناك أجزاء خدت وقت و مجهود و تفكير سواء في الفك أو التركيب
و هذا ما لا يظهره الفيديو طبعا
دة غير إن كان في بعض الأخطاء و تم إعادة بعض المشاهد لأن تم تركيب القطعة مثلا بطريقة خاطئة

و الحقيقة أن كل هذه الخبرة إكتسبتها في ثلاث أشهر تقريبا عن طريق المتابعة عالمواقع و مشاهدة الكثير من الفيديوهات علي اليوتيوب

المشاركة الأصلية كتبت بواسطة adelaboageen برافو عليك

تسلم يا باشا

المشاركة الأصلية كتبت بواسطة مصطفى-حسن شوف يا اخ ادهم انا ممكن استهلك كلام كتير عشان اقولك رأيى وانطباعى لكن انا هلخصة فى كلمتين اتنين ((((((( حالة ابداع )))))) سؤال على جنب الموضوع دة كان موجود فى منتدى تانى باسم تانى (بدون ذكر اسماء) ومش لاقية .. خير ؟؟؟؟؟؟؟

تسلم يا باشا ربنا يخليك
الموضوع بالفعل منشور علي منتديات تانية
و كان إسم الموضوع في الأول هو -----===== الجريمة الكبري ====-----
و لكن طبعا لما لقيت ناس كتير مش واخده بالها من فكرة الموضوع و يا تري بيتكلم عن إيه
إضطريت اراسل قسم الأشراف بتغيير عنوان الموضوع و تغيير مضمونه الداخلي عشان الناس تقدر تفهم الفكرة و تشوف الفيديوهات كويس

المشاركة الأصلية كتبت بواسطة zing0 و عاوزين فيديو مستقل عن الكربراتير فك و تنضيف و تركيب و ضبط ,ربنا يكرمك

و الله يا باشا أنا كنت عامل فيديو في بداية تجاربي في موضوع الفيديوهات دة
و عملت فيديو عن بعض الحاجات الصغيرة
زي تنظيف البوجيهات و تركيب الأبلتين و الكوندنسر و ضبط الأسبراتير
و تنظيف و ضبط الكاربيراتير و ضبط مسمار الهواء و السلانسيه و البنزين

كله موجود هنا يا باشا

https://www.facebook.com/epyptian.fiat.127

و تفاصيل كل فيديو مكتوبه تحته بيتكلم عن إيه