[kholio2005]

السلام عليكم اخوانى
ياجماعة ياريت اللى يتكلم يكون عن تجربة مش مجرد انه بس ان الواحد يسمع اى شئ يردده و خلاص أو مثلا علشان هى صينى تبقى زى اى حاجة صينى قليلة الجودة أو يكون شاف عيب مثلا زى ان الباب مش بيتقفل بسهولة تبقى العربية كلها وحشة
الحمد لله العربية معايا من حوالى 4 شهور
عايز اقولكو ان مفيش حاجة بالسعر دة لحد ازيد 50 أو 60 ألف جنيه ممكن تقارن بيها أساسا ولا حتى التيريوس اللى ممكن تقلب من اى شوية هوا بس المشكلة ان الناس اما بتسمع كلمة صينى تقولك على طول فيه حد يجيب حاجة صينى
العربية زيها زى اى عربية تانية فيها مميزات و عيوب
ممكن ألخصها فى الأتى , المميزات اللى شفتها الى حد الأن :
1- ارتفاعها عن الارض ممتاز و دة اكتر ماميميز العربية و مناسبة جدا لشوارعنا
2- السحب برده كويس جدا جدا بالرغم انها 1600 سي سي
3-صاجها قوى يعنى امتن مثلا من التيريوس
4-كماليات ممتازة
5- بالنسبة للتكييف هو كويس جدا جدا بالذات باليل , الصبح لو العربية واقفة فى الشمس مدة طويلة بياخد وقت شوية عقبال اما يسقع بس كل اللى فى العربية حيحسو بيه و بيقى زى الفل
6- من أكتر مايميز العربية الثبات بتاعها مع انها عالية بس يمكن اللى بيديها الثبات دة انها عريضة لان فيه مثلا عربيات عالية زى التيريوس أو الشيروكى الليبرتى الثبات بتاعها ضايع( ودة من كلام ملاكها يعنى مش بقول اى كلام من دماغى)
7- الموتور صوتوه هادى جدا يكاد ممكن متسمعوش لو انت واقف و العربية دايره
8-العفشة ممتازة ولاهى ناشفة ولا هى ناعمة
9- ممكن تتحكم فى وسع الصالون أو الشنطة لان الكراسي اللى ورا بتطلع لقدام و ترجع لورة وحتى اما بترجع الكراسي لورة خالص بتقى مساحة الشنطة واسعة برده
العيوب اللى شفتها اللى حد الان :
1- الابواب مش بتتأفل على طول يعنى لازم ترزعها بس اما روحت التوكيل ظبتتولى 3 أبواب و فيه باب واحد متظبطش كويس (بس اعتقد ان دة مش عيب قوى يعنى لان زى اى عربية فيه لمبة التابلوه بتقولك ان فيه باب مفتوح)
2- خامات الطابلوه و الابواب داخلية متوسطة الجودة يعنى تقريبا زى العربيات الكورى شوية
3- مركز الصيانة اللى روحته فى الاسماعلية فى صيانة الالف مش اد كدة يعنى تحس ان الصنايعية اللى هناك معندهمش خبرة اوىو تحس كدة ان مفيش اهتمام اوى بالعميل بس أعتقد ان اللى فى القاهرة حيكون أفضل يعنى مثلا كان فيه لمبة الدينامو بترعش بس قالولى ان الكهربائي مش موجود علشان يبص عليها فعملتهاش لحد اللواقتى مستنى اما اروح اى مركز صيانة تانى
4- التقفيل متوسط الجودة (على فكرة العربية بتنزل فى ايطاليا باسم dr5 و تقفيلها شكلو ممتاز جدا أكيد مش تقفيل زى أبو الفتوح)
5- استهلاك البنزين عالى شوية اما تمشي بيها جوة البلد يعنى 20 لتر ممكن يعملو حوالى 150/160 كيلو تقريبابس على السفر استهلاكها كويس

عايز اضيف حاجة ان معظم الناس هنا فى بورسعيد مش بيركبوا أى عربيات يعنى مثلا مش بيقتنعو الا باليابانى أو الالمانى(بالذات الهوندا أو الفولكس بجميع موديلاته بالذات الجولف) ومش بيقتنعوا باى عربية متقفلة فى مصر حتى لو مرسيدس بس العربية بدأت تعمل شغل جامد أوى هنا فى بورسعيد و ناس كتير جابتها

وبرده علشان الكلام يكون مظبوط انا بتكلم على الفترة اللى جربت فيها العربية من يوم ماستلمتها يعنى مش حنقدر نقول التقييم الفعلى 100% الا بعد تجربة العربية لاكتر من 3 سنين على اللأقل