[kj1]

د/ منال عمر
كيف تستعطفني و أنا بلطجي ؟

مستغرب أوي لما بشوف كل صفحات الإخوان ومؤيدوهم بيرددوا الكلام التالي:

......................... ......................... ......................... ......
قبل ما تنزل التحرير يوم الجمعة .. افتكر !!

افتكر : إن اصحابك في الجامعة وفي المسجد وفي النادي وفي الشغل وفي العمارة هيكونوا في رابعة_العدوية اللي السيسي عايزك تنزل عشان يقتلهم !

افتكر : إن أي حد هينزل أو بيدعم النزول هتكون كل قطرة دم سالت في رقبته !

افتكر : إنك بتعاون على قتل أخوك اللي هيفضل أخوك مهما اختلفتوا !

افتكر : إن فيه أطفال هيكونوا موجودين في الميادين !
......................... ......................... ......................... ......

حضرتك كدة بتستعطفني وبتحاول تصحّي الإنسان الميّت اللي جوّايا ..

إزاي تستعطفني وأنا في نظر معاليك بلطجي و منقضّ علي الشرعية وداعم للانقلاب وبحارب الدين ومبحترمش الصندوق ؟

إزاي تستعطفني وأنت بتدعي عليا كل يوم وأنت بتصلي؟

إزاي تستعطفني وأنت بتدعي ربنا ينصرك عليّا وكأننا في حرب؟

لما كان فيه مظاهرات واعتصامات عندنا فـ المنصورة .. وفي المحلة وبورسعيد والسويس والاسماعيلية .. خرج الريس بتاعك وقال : دول مش متظاهرين ، دول بلطجية .. وفرض حظر تجوال علي جميع مدن القناة .. وحضرتك كنت سعيد جدا وموافق .. يبقي إزاي الوقتي بتستعطفني وأنا في نظرك كدة ؟

إزاي بتستعطفني و أنا بلطجي ؟