[silverlite]

إحنا إزاي بقينا كدة ؟؟؟



منقووووول

من حوالي 7 شهور .. أيام الاستفتاء علي الدستور (أيام أحداث الاتحادية) .. وحرب الشوارع اللي كانت بين الإخوان (المؤيدين للدستور) والمعترضين علي الدستور ..

في أحد الشوارع لمحت عربية أمن مركزي بتجري ناحية المتظاهرين .. تضرب كام خرطوشة وترجع تاني .. تضرب وترجع تاني
...
ومجموعة من الإخوان .. بيجروا بجانب العربية .. يحدفوا طوب علي المتظاهرين ويرجعوا تاني مع المدرعة و بيحتموا برجال الأمن المركزي ..

ساعتها .. مش هعرف أوصفلكم إحساسي .. خصوصا لما جه فبالي إني انتخبت مرسي .. وسجدت لله شكرا لما أعلنوا فوزه علي شفيق .. وافتكرت لما كنا في جانب واحد في ثورة يناير ضد الداخلية والبلطجية والنظام كله ..

اربط بين الموقف ده مع اللي حصل من أسبوع كدة .. (المتظاهرين) وقفوا مع الشرطة والأمن المركزي في ناحية .. والإخوان في ناحية تانية .. أدام مبني الإزاعة والتليفزيون .. والمتظاهرين بيحتموا بمدرعات الشرطة ..

نفس الموقف مع تغيير الأدوار

.......................

موقف تاني عمري ما هنساه ..
أيام (محمد محمود) الجيش كان بيضرب علينا غازات غريبة .. المصابين كانوا بيدخلوا علينا في حالات عمرنا ماشفناها .. بعد كدة عرفنا أنها غازات أعصاب و قنابل فوسفور ..

مش هنسي منظر الظابط اللي دخل ضرب الدكاترة وطلعوا يجروا من الخوف .. ورمي قنبلة غاز علي المصابين وقفل عليهم الخيمة وماتوا كلهم ..

إحساس يخليك تموت ألف مرة كل لما تفتكره ..
أيامها الإخوان كانوا سمنة علي عسل مع العسكر .. وكل ما كان يشغلهم وقتها الدعاية لانتخابات مجلس الشعب الجولة الأولي ..

بعد كل ده .. مات فينا أحاسيس كتير

دلوقتي لما بشوف الشرطة بتضرب فيهم غاز وخرطوش ( مبزعلش ) .. رغم إني عارف كويس أن بتوع الأمن المركزي أغبياء في تعاملهم مع المتظاهرين

رغم إني اتعاطفت معاهم لما الجيش ضربهم أدام الحرس الجمهوري .. إلا إني سرعان ما افتكرت اللي اتعمل فينا قبل كدة .. فضاعت كل ذرة شفقة عليهم في ثواني ..

والنهاردة لما اتضرب عليهم غاز وخرطوش وأكيد ناس ماتت وإصابات بالجملة .. إلا إني مش زعلان ..

رغم إني دكتور وعارف يعني إيه قنبلة غاز في وسط حشد من الناس وناس مش عارفة تجري وناس عندها مشاكل فالتنفس أصلا .. كارثة ومش أقل خطورة من الخرطوش .. إلا إني (مش زعلان)

قول عليا معنديش دم .. قول إني مش إنسان .. أنت صح

أنا مش هكذب علي نفسي .. أنا مش فرحان بس برضه مش زعلان ..

الإنسان اللي جوايا مات لما شفت إيدك في إيد طنطاوي وهي مليانة بدم شهداء كتير .. وعيون ناس أكتر راحت غدر .. وأنت كنت فرحان بأغلبية البرلمان

.................

قبل متسأل إحنا ليه بقينا كدة .. إحنا بنسألكم أنتو إزاي خليتونا كدة ؟؟