[إسلام البنا]

أنا معايا حاليًا ماروتي ولكن برشحلك اللادا للأسباب التالية :
1- الماروتي ضيقة جدًا صالون وشنطة فمش عائلية خالص ولو ركبت اتنين تخان أو متوسطين ورا هتحك في كل مطب وتتمنى تنزلهم وممكن تبقى في موقف محرج ويطلبوا هما النزول من كتر الحك في المطبات
2- الصاج ضعيف وأقل خبطة بتبهدلها بعكس اللادا
3- العربية خفيفة وبتعوم على السرعات بعد 100 ك لو في طريق سريع بعكس اللادا الثابتة وأنا سقت اللادا قبل كدة لما كنت بتعلم عليها وعارف الفرق بينها وبين الماروتي كويس لأني سقت السيارتين وحافظهم وبفكر حاليًا أبيع سيارتي الماروتي وأجيب لادا أو كيا برايد
4- كاوتش الماروتي قطرة صغير ونحيف مما يؤدي لرجرجتها في الطرق المكسرة والمطبات صراحة بتقرفني في الحتت المكسرة بتفضل ترج بعكس اللادا أثبت منها إلى حد ما وكل العربيات بترجرج في الطرق المكسرة لكن بنسب بتختلف من عربية لعربية تانية
نصيحة لله لو عايز عربية عائلية ابعد عن الماروتي وخليك في لادا أو مثيلاتها من السيارات الواسعة لأني بقلك باختصار تجربتي مع الماروتي ضيقة وخفيفة ومش ثابتة في السرعات العالية وصاجها ضعيف بعكس اللادا قوية وأكثر ثبات وعائلية وعالية إلى حد ما عن الأرض عكس الماروتي
لو فعلًا أنت مش غاوي كماليات تكييف وبور هات لادا واتوكل على الله
وموفق في الشراء إن شاء الله