[sayed2077]

السلام عليكم ورحمة الله وبركاته

طبعا كله عارف انى كان عندى جوان وش السلندر ضارب وبيدخل ماية على الزيت والبساتم وكانت حاجه منيلة

المهم بصراحه انا قلت اسيبها لبعد الامتحانات اكون فاضى بس لقيت انى بقيت بتشحطط فى المواصلات بجد وطالع عينى

قلت خلاص بقه انزل اشترى حاجتها علشان اعملها واخلص

وفعلا الاشياء اللى اشتريتها

1:جوان وش سلندر دوبل 25 جننية
2:فلتر زيت 15 جنية
3:علبة زيت شل الاحمر من بنزينة شل 75 جنية غلى 5 جنية عن المره اللى فاتت

المهم صحيت النهارده ورايا امتحان الساعه 4.5 عصرا
قلت انزل اعملها بدرى اكون خلصتها

توكلت على الله ونزلت

وجيت ادور لقيتها حلفت ما هى دايرة مع العلم انى بقالى بتاع اسبوع ضاغط جامد على البطارية والمارش وده اللى ظهر اثارة النهارده وربنا يستر

المهم مكنش فيه غير انى اقطرها لغاية الاسطى محمد الميكانيكى و هو يبقى على فكره اخو الاسطى احمد متخصص الكهربا والتكيف اللى ليه موضوع فى الموقع عن تركيب تكيف ساندن جديد وناس راحتله من اسكندرية واسماعلية و المنصورة ومن حتت تانية والحمد لله كله شكر فيه جدااا


والاسطى محمد بصراحه ميتخيرش عن اخوه الاسطى احمد وزى ما الاسطى احمد استاذ كهربا وتكيف زى ما الاسطى محمد استاذ ميكانيكا بمعنى الكلمه وخصوصا السيارات الحديثه لانه بيشتغل جامد فى سيارات زى اللانوس والفيرنا و البى واى دى و الاسبرانزا بحكم انه بيجيله كتير تكسيات من الانواع ديه وبيعمل كل حاجه فيها من اول تغير البوجيهات الى تعميرها من اول وجديد غير طبعا شغل العفشه والفرامل وكدا

بصراحه ممتاز بمعنى الكلمه

المهم قلت يا فتاح يا عليم يارزاق يا كريم وزى ما بقولكم نزلت 11 من البيت وجيت ادور مدرتش ببص فى مقاس الزيت لقيته بقى زياده اوووى من كتر المايه اللى دخلتله طبعا قلت خلاص بقى مفيش فايده واستنيت من 11 لغاية 12 علشان حد يرضى يقطر العربيه لغاية ما لقيت عربيه تعبانة اوووى قلتله تقطرنى قالى ماشى وفعلا جبنا وير سلك فولاذ و ربطنا بيه العربيتين ووصلت للاسطى محمد وركنا العربيه قدام الورشة وبدائنا الفك للماتور

و طلع ان الجوان كان خلاص فعلا انتهى وانا صورت بعض الصور بس مش لغاية النهاية لانى للاسف كان ورايا امتحان زى ما بقولكم وصورت لغاية ما جيت امشى

واليكم الصور

ديه صورة لما فكينا الوش اللى مغطى عمود التاكيهات ولو ركزتوا شوية هتلاحظوا ان الماية داخله على الزيت والدنيا كانت بايظه خالص


وديه صورة الغطا اللى مغطى عمود التاكيهات والطحينة اللى فيه حدث ولا حرج لا تسر عدو ولا حبيب



وديه صورة الاسطى محمد اثناء فك سير الكاتينه



والصورة ديه بعد ما شيلنا خلاص وش السلندر خالص و طبعا كان الاسطى محمد لسه شايل وش السلندر طازة ولسه هيبداء يظبط الدنيا

وديه صورة وش السندر بعد ما شيلناه من العربيه


وطبعا عند اخر صورة ديه كنت انا مشيت خلاص رايح على الامتحان
ومقدرتش اصور ايه اللى حصل بعد كدااا

المهم اللى حصل ركب الجوان خلاص الحمد لله بس للاسف اتضح ان المروحه مش شغالة فالعربيه كانت هتسخن تانى فطبعا انا جيت من الامتحان اخدت العربيه وطيران على الاسطى احمد وسيبت العربيه عنده يشحن البطارية الغلبانة اللى بقالها اسبوع بتدور العربيه اكتر ما بتتشحن ههههه ويشوف بالمره المروحه مابتشتغلش ليه المهم سيبت عنده العربيه وطيران على المترو علشان عندى كورس ميكانيكا (مش ميكانيكا سيارات لا ميكانيكا زى بتاعت ثانوى كدا ) المهم اخدت الكورس ورجعت له
طلع ان المروحه مش بتشتغال علشان الكتاوت بتاعها مش متثبت كويس فى مكانه و ركبت البطارية وهوب طيررررررران على الكورنيش بقالى كتتير مش بسوقها باستمتاع وفعلا بجد عارف لما تبقى مبتشوفش حد بقالك فتره ومره واحده بقى معاك ه ده الى حصل بالظبط

بس وخدت بيها لفه كده سريعه على الكورنيش ورجعت وقفت عند سوبر مركت عند اول شارعنا نزلت اجيب حاجه وجيت ادور هووووب لقيت المرش كان البطارية نايمة وهووب مره واحده يشتغل كويس فعرفت ان المرش هيبقى فيه مشكلة نتيجه للتحميل الزائد اللى كان بيحصل عليه الفتره اللى فاتت لدرجة انى فى مره خلصت بطاريتين عليه اه والله بطاريتين ساعتها كانت العربيه بتدور بصعوبه جدااا وكانت مخنوقه و بتدور بعد سنه بس الحمد لله على كل شىء و بصراحه كتر خيييرة اووى ووقت فضى بقى ابقى اروح اشوف فيه ايه ده كمان هههههههههه

والمصنعية كانت 100 جنية

يبقى كله على بعضه

25 جوان وش السلندر
+
15 فلتر زيت
+
75 جركن زيت شل الاحمر
+
7 جنية جوان فرن شكمان جبته بعدين علشان القديم كان بايظ
+100 مصنعية

يبقى كله

حوالى 225 جنية والحمد لله على كل شىء

وديه كانت نهاية تجربتى مع تغير جوان وش السلندر وقدر الله ماشاء فعل

و

السلام عليكم ورحمة الله وبركاته