المشاركة الأصلية كتبت بواسطة tmtmali
طب لو سمحتى لو عايزة اركن بالظهر انا مش بعرف اركن بظهرى خالص و يا ريت بلاش تريقة لو سمحتوا لان اكيد انتوا متعلمتوش الحاجات ده فى يوم و ليله اكيد بالممارسة ده انا كمان اصلا عندى مشكلة انى مبعرفش ارجع بظهرى يعنى مثلا لو دخلت شارع و لاقيت حد فى وشى مبعرش ارجع بظهرى مش ببقى عارفة الف الدريسكون يمن و الا شمال يا ريت تفيدونى  |
كله بالتمرين حضرتك تروحي في مكان فاضي و تتمرني (المكان اللي اتعلمتي فيه ) و انتي بترجعي بظهرك تحطي ايدك اليمين ورا الكرسي اللي جنبك و تبصي ورا و تبتدي تتحركي عادي مع مراعاة انك تبصي ادامك كل شوية عشان لو فيه حاجة و خصوصا لو فيه حاجات على يمينك و شمالك لان وش العربية بيرمي يمين و شمال جامد
بالنسبة لحركة الدركسيون فده خديها بتلقائية و ما تقعديش تفكري و تحسبي كتير و ما تدوخيش نفسك مع يمين و شمال و فوق و تحت هي هي زي السواقة للامام نفس الخطوات : تبصي ناحية الحاجة او الماكن اللي عايزاها و توحدي الدركسيون في اتجاهه .. مثلا هتلفي في شارع جانبي بظهرك تبصي ورا و تحودي الدركسيون ناحيته و تمشي .. لو الشارع على الجنب اللي من ناحيتك (كرسي السائق) هتحودي الدركسيون ناحية الباب بتاعك ( شمال) ... لو الشارع على الجانب اللي من ناحية اللي راكب جنبك ( كرسي الراكب الامامي) هتحودي الدركسيون ناحية اللي راكب جنبك (يمين) .. سواء ماشية للامام او الخلف العربية هتمشي ناحية الجنب اللي تلفي الدركسيون عليه
و في الناهية كل حاجة بالتمرين و التخبيط و التعود و السواقة مالهاش كتالوج .. الحاجة اللي تلاقي نفسك ضعيفة فيها اتمرني عليها