اخر كلام عن الانترا الجديده
شوفو بقي الانترا الشكل الجديد في السوق أكتر من سنة و نص و مؤكد الناس جربتها كويس و عرفتها صح. عايزين كل واحد من ملاك الانترا الجديدة يدخل هنا و يقول كل حاجة حلوة فيها و كل حاجة وحشة و نتناقش فيها و ممكن نخلي هنا مكان لأي سؤال أو حاجة ما حدش عارفها عنها.
مبدئيا أنا بحبها قوي مش عارف ليه حاسس اني بلاقي نفسي فيها و بحس انها واحد صاحبي مش عربيتي. مع اني اشتريت عربيات كتير قبلها زي دايهاتسو شاريد و بي ام 316 مو 81 و هيونداي اكسل و فيات سيينا و هيونداي فيرنا و هيونداي الانترا الشكل القديم و لانسر سوبر أكشن و سيراتو الشكل الجديد لكن ديه الوحيدة اللي لقيت فيها نفسي مع العلم بأني مش موهوم بأمكانياتها أو شايف أنها أحسن واحدة في العربيات اللي قبلها.
المهم عاوز أسأل الناس (ملاك فقط) عشان تكون الاراء عن تجربة ايه أخبار البنزين؟ أنا التنك بيعمل معايا في وسط البلد حوالي 400 كم مع العلم اني بفول حوالي 38 أو 40 لتر يعني نقول اللتر بيعمل 10 كم. و كمان أنا علي طول بجري مش بحرق لكن ال RPM 4000 مثلا و كمان معظم الوقت العربية بتسقط نقلة واحدة تحت مش اتنين. و مش بسيب دواسة البنزين الا لو الطريق بيقفل أو عربية قدامي. و كمان معظم الوقت التكييف شغال عشان معايل الولاد. يا ريت كل واحد يكتب طريقة سواقته مع استهلاك البنزين.
|