[ahmed_eng2001]

المشاركة الأصلية كتبت بواسطة الهولندى الطائر أستاذ الله ينور اهو ده الشغل ولا بلاش انا بحبك علشان حضرتك من نفس المدرسة اللى انا منها وهى help your self ياريت بقى توضحلى بعض النقط علشان الاستفادة تكمل ايه هو شريط رايش اللى استخدمته وايه فايدته وشكله بتروح للخراط تقوله ايه ؟ وايه هو المكبس؟ لازم الكبس والفك يكون عند الخراط ؟ولا فيه حد غيره ممكن يعملها بجهاز او ما شابه قطع الغيار جبتها منين ؟ او عند مين بالضبط بتوع الاستيراد ولا بتوع الفتايس ولا منه ده على ده الشحم اللى استخدمته ؟ الزيت اللى استخدمته ؟ العدة او الادوات التى استخدمتها بشدة ومهمة جدا فى نظرك ايه وظيفة كل جزء طلعته عمود الدرك - الاكس - بلية الدرك - او ايه اللى ممكن تعرفنا وظيفته وشكرا على الموضوع المتميز فعلا - وكل سنة وحضرتك طيب

ربنا يكرمك و يعزك و كل سنة و حضرتك طيب
انا بحاول اعمل الحاجة الى اقدر عليها بنفسى .... و اشتغل بمزاج
بص يا باشا
اى حاجة بتعتمد عبى الفكرة الى فى الصورة دى تسمى راتشيت



زى مفاتيح الراتشيت .... الى انا استخدمته حزام راتشيت .... زى الى بيستخدموه عربيات النقل احيانا فى تثبيت الحمولة عليها


جبته من شارع الجمهورية بـ 50 جنيه .. الراتشت الصغير زى الى فى الصورة
فيه كمان الراتشيت الكبير ...اسف مش فاكر تمنه كام
استخدمته فى شد الفتيس ناحية الموتور

ده شكل المكبس الهيدروليكى


و ده بيكون فيه بستون زى الكوريك الهيدروليك الى بتستخدمه العربيات النقل الكبيرة
حضرتك تروح عند خراط و تقوله انا عاوز اكبس التروس علشان اطلعها من على الاكس
و لازم تتعمل على مكبس ..... اوعى حد يقولك تطلع بالطرق عليها بالشاكوش
مش كل الخراطين عندهم مكبس ... و بصراحة انا معرفش حد تانى ممكن يكون عنده مكبس غير الخراط

ان شاء الله انا حروح لحداد نضيف حخليه يعملى هيكل المكبس ... و اشترى كوريك هيدروليك 30 طن و اخليه يثبتهولى فى الهيكل

قطع الغيار جبتها من محل قطع غيار سيارات .... لو ما كنتش لقيت ... كنت حروح لحد بتاع فتايس او بتوع الاستيراد

انا مستخدمتش شحم كتير .... حكيت شوية شحم خفيفة على البلى علشان بداية الحركة قبل ما احط زيت الفتيس
فى التركيب ... استخدمت زيت خفيف علشان التروس تتحرك بسهولة على الاكس
و المفروض ان الخراط يحط زيت و هو بيكبس التروس

الادوات المهمة
العدة العادية .... طقم لقم ....عتلة صغيرة ... مطرقة كاوتش او بلاستيك
و نفعنى جدا ونش زرافة

و ده عند بعض الميكانيكية .... من غيره مكنتش حقدر اركب الفتيس

عمود الدرك ... ده العمود الى بيركب فى الاسطوانة و بيوصل الحركة للتفيس
الاكس .... اى محور بيلف و بيركب عليه تروس و بلى و اويلسيلات ... الفتيس فيه 3 اكسات .... عمود الدرك بيركب على اكس مجموعة الادارة .... و فيه اكس تانى بيسموه الشجرة
بلية الدرك .... هلى بلية الى بين عمود الدرك و بين جسم الفتيس
الغوايش .... و دى الى بتعشق فى حاجة اسمها فول عن طريق مشقبيات فى الغويشة .... فتمكن من نقل الحركة من الاكس للترس .... و بتتعمل نحاس علشان لو فيه تحميل خاطئ او احتكاك خاطئ النحاس هو الى يتاكل .... و التروس الحديد تفضل زى ما هى

فول التعشيق .... قوالب صغيرة مستطيلة الشكل الى الغوايش بتعشق فيها و بيكون فيها سوستتين من الناحيتين

انا تحت امرك لو حضرتك حبيت تسأل عن اى حاجة تانية