[نسر عربي]

كلامك صح، هندسيا الحكاية مش محتاجة المبالغ الوهمية دي، مش منطقي اني اصرف بنزين سنة او اكتر على كم ترس و كم بكرة و سير! على فكرة الحل لجشع التوكيلات في مصر ان الناس في مصر تتفق انها تشتري من التوكيل اللي بيعلن بوضوح عن اسعاره اول ما تشتري العربية، مش نظام عندنا الفانوس ب 300 جنيه و الاكصدام ب بمش عارف كم، لا ده انت تقول للمشتري بعد 60 الف حتغير الكاتينة بكم و بعد 200 الف حتعمل نصف عمرة بكم و هلم جرا.
دي حاجة، الحاجة التانية انا عايز اعرف مين بيستورد كاتينة للماهيندرا خارج التوكيل، الموتور بتاعها موتور الرينو لاجونا فاكيد الموتور ده و الكاتينة بتاعته يمكن استيرادهم مش قصة. و على فكرة هو ده سر امتناع توكيل ماهيندرا عن طلب عربيات بنزين موديلات جديدة و بقى كله ديزل على طريقة lose lose المصرية الاصيلة لان طبعا زبون الماهيندرا معندوش وقت يقضيه سهران نصف الليل قدام محطات الديزل مع عربيات النقل فكدة الماركة خسرت و الزبون خسر و التوكيل خسر.

الحاجة الثالثة و دي على مستوى دولي و حتخلي اي عربية جديدة تتباع بشلن زي ما حصل في الكمبيوتر الشخصي انه تتباع ماركة عربية يكون تصميمها مفتوح و مجاني، يعني ممكن يتعمل قطع غيار متوافقة من اي مصنع تاني زي ما شركة اي بي ام علمت كدة في الكمبيوتر و جابت سعره الأرض.