رد: مغامرات المفتش برومبو
20
فى مكتب عبقرينو والكل متوتر وبرومبو هو اللى رايح جاى فى الاوضه وابو نورا وعبقرينو بيبصولو بقلق
والكل بيبص فى ساعته وعينيهم على التيليفونات بتاعتهم مستنين اتصال من بوند
برومبو وهو بيشاور لعبقرينو : انت متاكد ان القناع اللى عملته لبوند صعب يتكشف او حتى حد يلاحظ انه قناع مش طبيعى
عبقرينو : عيب عليك......... ده الجهاز ده اختراع يتسجل باسمى حاجة كده زاى الكومبيوتر كوبى وبيست بيطلع نسخة طبق الاصل من الطبيعى .......
وكمان عجينة القناع مختلفة عن اى تركيبة تانية ........ حاجة كده شبه جلد البنى ادميين بالظبط ......
ابو نورا : هو فعلا القناع كان يشبه جدا الصورة اللى جت من المخابرات بعد المكالمة اللى برومبو خلانى اعملها لوزير الداخلية نطلب فيها صورة لموشى بن مهزوز واى تسجيل صوت ليه
عبقرينو : وعلى فكرة جهاز تقليد الصوت هايخلى صوت بوند هو هو تقريبا صوت موشى
ابو نورا : لكن المشكلة ان بوند اطول شوية من موشى ......... بس يارب ما حد ياخد باله
برومبو : هى فعلا تبقى مشكلة لو كوهين شاف بوند او حتى ليفة قبل مايمسكوه ويديلوه الحقنة
ابو نورا : بمناسبة الحقنة يا عبقر ......... الدوا اللى فيها ده مفعوله بيقعد اد يه
عبقرينو : المفروض ان الدوا ده يفضل تأثيره حوالى 18 ساعة والراجل فى التوقيت ده هايبقى فى ايدينا زاى العجينة
هايقول ويعمل اللى احنا عايزينه ولما يفوق مش هايفتكر حاجة خالص
ابو نورا : يبقى مش فاضل غير انهم يخرجو بيه من السفارة ويطلعو بيه على الصحراوى عشان نكمل بقية الخطة
برومبو : المفروض ان زومة هناك دلوقتى فى الموقع اللى حددناه بالظبط ومعاه الحاجات اللى جهزها عبقرينو ومجهز العربية واتفق مع الموزّة واللذى منه
ابو نورا : والسيد وزير الداخلية طلب استدعاء قائد طقم الحراسة لليفة هو والطقم اللى كان معها عشان يفهمهم الكلام اللى هايقولوه
وانا جهزت دورية الشرطة بالاتفاق مع الكمين اللى عند الكيلو 70 عشان بقية المهمة
برومبو : و د / بولبولان مستنى منى الاشارة عشان يكلم طارق حسن رئيس تحرير الاهرام المسائى ويفهمه على المطلوب منه
وكمان هايكلم اسامة سرايا رئيس تحرير الاهرام و محمد بركات رئيس تحرير الاخبار
يبقو يورونى بقى هاطلعو منها ازاى ولاد الكهينة دول......... دى سمعة بلدنا مش لعبة يا اخوانا
يتبع
__________________
عجبي علي العجب العجيب العجاب
لما الحقيقة تطل بعد احتجاب
و تروح و تحلا وفجأة تصبح مفيش
كمثل طراطيش بحر ياما خد و جاب
عجبى !!( صلاح جاهين )
|