رد: مغامرات المفتش برومبو
2
فى بيت برومبو
وجوة اوضة نومه برومبو نايم مشتح على السرير بهدومه الداخلية وعايوشة مراته بقالها ساعتين بتصحى فيه
" اصحى يا منيل على عينك العصر بيدن هاتفضل موخم فى البيت كده لاشغلة ولا مشغلة"
صرخت عايوشة بعلو صوتها على برومبو وهو نايم بيشخر مش عايز يتعتع من مكانه بعد سهرة امبارح على القهوة مع شلة الانس والمغامرات سوكة وزومة ومجانص واكلة الفشة والممبار اللى طبقت على مراوحه ومخلياه نايم قتيل
عايوشة : " طب والمصحف الشريف لو ماصحيت هادلق عليك مية ساقعة فى قفاك وورينى بقى هاتفضل نايم ازاى "
برضه برومبو ولا هو هنا وشخيره جايب اخر الحارة ولا موسيقى حسب الله
جريت عايوشة على التلاجة وجابت ازازة متلجة وهوووووووووووووب فى قفا برومبو
برومبو : حى ........ الله يقطعك ياعشعش مش عايزة ياولية تبطلى الخصلة الهباب دى .... وبعدين بتصحينى ليه
عايوشة : احنا بقينا العصر وانت لسة نايم وانا عايزة اروق الاوضة وكمان صاحبك الدكتور اتصل بيك مرتين
برومبو : الدكتور احمد هوبة ......... ودا عايز ايه على الصبح
عايوشة : صبح ؟؟ صبح ايه ياراجل بقولك بقينا العصر ......... قوم طس وشك بشوية مية وشوفلك حاجة تطفحها وبعدين انزل روحله شوف عايزك ليه
برومبو : وانزل ليه ياستى ......... ماكلمه فى التليفون اخليه يجى هنا
عايوشة : هنا فين ... والنبى مايحصل ....... بقولك عايزة اكمل تنضيف الشقة .... بقى انا بزحلقك منها تجبلى مصيبة تانية ....... يالا فز قوم
برومبو فى سره : " يا ساتر يارب ....... انا كان ايه رمانى الرمية المهببة دى ..... الله يسامحك ياخالتى
مش كنتى دفعتى الجمعية المتأخرة اللى عليكى بدل امى ماتجوزنى بنتك تخليص حق ..... يالا كله بثوابه "
قام برومبو استحمى وكل لقمة فى السريع وغير هدومه واتصل بالدكتور احمد هوبة الدكتور النفسانى وقاله انه هايعدى عليه فى البيت قبل مايروح العيادة
يتبع
__________________
عجبي علي العجب العجيب العجاب
لما الحقيقة تطل بعد احتجاب
و تروح و تحلا وفجأة تصبح مفيش
كمثل طراطيش بحر ياما خد و جاب
عجبى !!( صلاح جاهين )
|