رد: تكييف كريستالة
انا عندى برضك كريستاله 99 ومن شهر كده لقيت التكييف مابقاش زى الاول بالنهار يكاد يكون مفيش تكييف وبالليل كويس الى حد ما وبعدين بقى بالنهار مفيش تكييف خالص وبالليل بياخد وقت طويل جدا على ما يسقع وتسقيع اى كلام قولت اكيد الفريون بيسرب وفضى خالص روحت لواحد بتاع تكيفات قاس شحن الفريون لقاه تمام بس مفيش اى تسقيع مسك ماسورة الساقع بتاع التكيف جوه الكبوت لقاها مش ساقعة وبعدين لقيته بيقولى العيب عندك من فلتر الفريون مسدود ( فلتر الفريون ده اللى بيبقى فيه العدسة) عاوز يتغير بس الفريون اللى فيها هيطير وهتشحن تانى بصراحة انا ما كنتش مقتنع المهم فضى الفريون وجاب فلتر فريون جديد من عنده ب 100 جنيه وفك الدرج بتاع التابلوه وفك المروحة ونظفها وجاب خرطوم ميه جوه العربية وغسل التلاجة من تحت التابلوه ودخل الخرطوم مكان ما فاكك المروحة كده علشان يوصل بايده للتلاجة بالخرطوم والمية كانت بتقع تحت العربية فى الشارع وركب وكبس هواء علشان يكشف على اى تنفيس لقى تمام شحن فريون وبقى كله تمام ورجع يسقع احسن من الاول والهواء بقى اقوى من الاول والكمبروسور بقى بيفصل كتير علشان بقى بيوصل لدرجة التبريد المطلوبة اسرع بس واخد 280 جنيه 100 فلتر و 120 فريون و 60 مصنعية اه صحيح العربية دى مفهاش فلتر هواء علشان ما تدورشى عليه وفيه حاجة بس مش متاكد منها هوه غالبا حدد انها عاوزه فلتر فريون لما مسك الماسورة بتاع الساقع من بعد الفلتر ومالقهاش ساقعة ومن قبل ما تدخل الفلتر ساقعه فعرف ان الفريون مش بيعدى من الفلتر واسف على الاطالة بس انا حبيت احكى اللى حصل معايا ممكن حد يستفاد
|