رد: ما هي اطري انواع الكاوتش
المشاركة الأصلية كتبت بواسطة tham1010
معلم يا بوريوى وكلام مهم. فى سؤال صغير يعنى ايه 5 psi انا عادة بضبط الضغط على 30 وبكون مشيت شوية كتار بالعربية. لما بركب العربية الصبح بحس ان الفردة بتاع الكوتش مريحة شوية مش همه عن الارض وشدة حلها
|
الـpsi هي اختصار لجملة Pound per Square Inch أو بالعربي يعني "رطل على البوصة المربعة"، ودي وحدة انجليزية لقياس الضغط
الـpsi هي الوحدة اللي بنستخدمها عادة في محطات البنزين... لما بتقول لبتاع الكاوتش ينفخ على 30.. يعني 30 psi
فيه وحدة تانية اللي هي الـ"Bar"، وعادة هتلاقي على قايم العربية ورقة عليها قيمة الضغط بالـ"Bar"...
Bar = 14.5 psi
زي ما حضرتك بتقول... الفردة بتبقى مريحة عشان بتنفخها على الساخن... حضرتك عارف إن الهواء لما بيسخن بيتمدد وده بيؤدي لإن الضغط يزيد... فلما بتظبط على الساخن وتيجي تركن العربية... الهواء يبرد وضغطه يقل.
حاول تظبط الهواء عند واحد بتاع كاوتش ما يبعدش عنك أكتر من 1 كيلومتر، ولو ما قدرتش... اعمل حسابك تزود الضغط بحوالي 2 أو 3 psi
يعني تظبطها على 32 أو 33 .... وماتخافش... انت كده بتحافظ على الكاوتش وبتظبط العربية
على فكرة.. لو عربيتك محملة ناس وشنط في سفر مثلا... زود ضغط الكاوتش الخلفي 2 psi كمان... مفيش أي قلق ما دام ما تعديتش الرقم الأقصى المكتوب على الكاوتش (الرقم مكتوب على البارد).
أفضل حاجة يبقى معاك عداد تقيس بيه الضغط والعربية لسة ما تحركتش... وعلى فكرة في كارفور أو أي هايبر هتلاقي كمبريسور محمول عشان تزود بيه العجل وبيشتغل على بطارية العربية (وفيه عداد).. اعتقد تمنه في حدود الـ100 جنيه
...
التعديل الأخير تم بواسطة borio1704 ; 20-07-2012 الساعة 03:55 AM
|