[POP EL GAMED]

المشاركة الأصلية كتبت بواسطة mohamed_aly السلام عليكم ورحمة الله وبركاتة انا معايا كليو هاتش 2002 بقالها معايا سنة و نص واشتريتها بحالة كويسة جدا بس المشكلة ان بدأت كل شوية عيوب تظهر وخصوصا لمبة الانجكشن كل فترة لازم تنور و روحت التوكيل كذا مرة وكل ما امشي من التوكيل بعد اسبوع او اقل يرجع نفس العيب وتنور اللمبة وفي الاخر قالوا في مشكلة في الماتور تقريبا الكربراتير عايز يتغير وقالوا احنا نضفناه وصلحناه المهم يعني العربية قعدت حوالي 4 شهور شغالة زي الفل ومن اسبوع اللمبة نورت تاني يا ريت لو حد يعرف حاجة عن الموضوع دة يفيدني وهل لو البوجيهات ضعيفة ممكن اللمبة تنور او فلتر البنزين وفلتر الهواء مع العلم اني من ساعة ما اشتريت العربية مغيرتش حاجة منهم غير فلتر البنزين وبقالة اكتر من سنة وسؤال تاني بخصوص زيت الفتيس وزيت الماتور اية احسن انواع زيوت لكليو 2002 مع العلم اني بحط زيوت موبيل 1 وتلاجة التكييف بتسرب يعني لازم تتغير ومش لاقي اصلي غير مستعمل و بصراحة مش عايز اتعامل مع التوكيل يا ريت حد يفيدني ولكم جزيل الشكر

اهلا بحضرتك يا باشا
اولا بالنسبه لموضوع لمبه الانجيكشن ازاى قالوا لحضرتك ان الكاربيراتير عايز يتغير اذا كانت اى عربيه انجيكشن مفيهاش كاربيراتير هو يمكن قالوا لحضرتك الرشاشات وانت مخدتش بالك
ممكن تكون محتاجه تتنضف (طيب هى ايه اخبار استهلاك بالنزين معاك الطبيعى ولا زياده)

ثانيا بالنسبه للبوجيهات مش هتخلى لمبه الانجيكشن تنور انما ممكن مشفتهاش غير مرتين بس بسبب فلتر البنزين وفلتر الهوا مالوش علاقه بلمبه الانجيكشن بس نصيحه منى اكشف عليهم وغيرهم لان الطبيعى فى فلتر البنزين والبوجيهات انهم بيتغيروا كل سنه او سنه ونص
بخصوص زيت الفتيس هو مبيتغيرش هو بيتزود(بيتغير لو العربيه اوتوماتيك) لو مانيوال بيتزود ده لو ناقص
بالنسبه لزيت الموتور هو احسن انواع اما توتال او امارات مصر دول الانواع المجربه فى كذا عربيه كليو وميجان 1 ورينو 19 ورينبو يعنى فى معظم العربيات الرينو اللى اتعاملت معاها وكان معظمهم شغالين بزيوت توتال
موضوع ثلاجه التكييف ده احسن حاجه انك تجيبها استيراد مستعمله لانها لو جديده هتبقى غاليه جدا
ومتقلقش من الاستيراد لانه بيبقى على التجربه ومتقلقش لو مش مظبوطه بتغيرها وبتبقى اصلى واحسن حاجه انك بتبقى متأكد انها اصلى لانها بتبقى مفكوكه من عربيات متقطعه وعلى فكره بجد فيه قطع غيار استيراد كتير بتبقى احسن من الجديد
واتمنى انى اكون قدرت ارد على استفسارات حضرتك ولو فيه اى استفسار تانى انا موجود بأذن الله
اخوك بوب الجامد