[sam ram]

المشاركة الأصلية كتبت بواسطة فادى و فى النهاية لن تستبدل السيارة الكهربائية السيارة العادية طالما استمر تدفق البترول, لأن هذا ضد قوانين الطبيعة, اذا ما نفذ البترول نبقى نشوف بقى السيارة الكهربائية و الهيدروجينية و غير ذلك, لكن الان, لا معنى للتفكير فى بدائل.

انا مش حرد على الجزء السياسي .. مش خوف او عدم رغبه ...
لكن لأنه موضوع تاني خالص ومش عايز اربط بينه و بين كلامي
ولو دخلنا في الانتماء الوطني و صراع الحضارات ودعم الغرب والضغط على الدول المنتجه للبترول و الاحتباس الحراري ... يبقى مش حنخلص فعلا

لكن حرد بطريقه تانيه اطمنك بيها على البترول
انا شخصيا برغم اقتناعي الكامل بوجوب ايجاد بدائل للبترول
الا اني بستخدم عربيه بنزين
ومعتقدش اني ممكن استخدم عربيه بأي مصدر طاقه اخر حاليا او في القريب العاجل او الاجل ..
لأنها ببساطه فوق قدراتي الماديه .. امكانياتي المعيشيه ( معنديش جراج اشحنها فيه ) .. غير عمليه بالنسبه لي حتى هذه اللحظه .. ظروفنا الحياتيه اليوميه ..
واسباب تانيه كتييييره أوي ... ممكن اختصرها ان حاليا محرك البنزين هو الافضل و الانسب و الارخص !!
واشك حتى اني ممكن الحق اسوق عربيه بالكهربا .. على الاقل في مصر بعد 20 او 30 سنه من دلوقتي

بس حسألك سؤال افتراضي:-
لو عرفت مثلا ان الاوكسجين حيخلص خلال 50 سنه بسبب قله التمثيل الضوئي للنباتات ( مجرد مثال )
حتدور على حل من دلوقتي ؟؟
ولا حتستنى لحد ما الاوكسجين يخلص و بعدين نبقى ندور بقى على حل ؟؟!!
بأعتبار أنه حاليا لا معنى للتفكير في بدائل

مفيش حاجه بتطلع في يوم و ليله .. الناس بتخطط و تفكر النهارده لسنين طويله قدام
فمتقلقش من بكره ... بس برضو متقفلش الباب وتتقوقع ... التغيير قادم لا محاله ..
الفكره مش انك ازاي تمنعه او ترفضه .. لانك ببساطه مش حتقدر
لكن الأصح ... ازاي تتعامل معاه و تحوله لمصلحتك

في كلام ان المعادن النادره في الصين يمكن التنقيب عنها في شمال افريقيا ..
يا سلام لو عندك بترول و بتصنع بطاريات متطوره ..او على الاقل بتصدر المعادن النادره اللازمه لتصنيعها ..
وابقى خلي الغرب بقى ساعتها بقى يفكر في استخراع جديد