بعد إذنكم أنا جديد فى موضوع السواقة
و عايز أشترى حاجة زيرو و كنت محتار أوى بين شيفروليه لانوس و هيونداى فيرنا و رينو لوجان و سانديرو أو سانديرو ستيب واى المبلغ اللى معايا حوالى 75000
و رحت لفرع المصرية للسيارات بالأسكندرية و شفتهم على الطبيعة لكن للأسف السانديرو و السانديرو ستيب واى مش هناك
من متابعتى لريفيوهات الناس على النت الفيرنا بتتميز بالمحرك و أسعار قطع الغيار و توفرها و سهولة الصيانة لكن للأسف شكلها مش عاجبنى خالص و حاسس أنى هجيب عربية موديل 2004
اللوجان شكلها عجبنى لكن لقيت مكان الأيرباج فى التابلوه للراكب الأمامى خالى و شكله وحش و سألت فى معرض المصرية عن إمكانية تقفيله و قالى مش هينفع و سألته برضه هل السانديرو فيها نفس الموضوع ده و قالى اه
للانوس شكلها معقول و إن كان ميفرقش كتير عن الموديلات القديمة و الموظف فى المعرض نصحنى بيها عشان موضوع الصيانة و إعادة البيع و قطع الغيار
سؤالى لحضرتك و لأهل الخبرة هل أسعار قطع غيار اللوجان مازالت غالية جداً رغم إنتشار العربية فى السوق المصرى؟؟
و هل قطع الغيار متوفرة؟؟
و هل يمكن صيانة العربية خارج التوكيل و لا زى الناس مبتقول أن رينو بتعتمد على بيع قطع الغيار و الصيانة أكتر من ثمن العربية نفسه؟؟؟ مع العلم أنى من الأسكندرية يعنى أظن الموضوع أسهل من الأقاليم
هل السانديرو تختلف عن اللوجان فى شئ غير الشكل و وجود فرامل ABS؟؟
و ايه الفرق بين السانديرو العادية و الستيب واى؟؟؟
و إن كنت لست من هواة الجرى و لا السفر الكتير هل تعتبر اللوجان أو السانديرو عربية ملاءمة لإحتياجاتى الشخصية؟؟؟