رد: مشط الكهربا فى الفيليشيا
اخى الفاضل
فيه فكرة كنت بعملها اوقات
لانى بحب الالكترونيات جدا
وعاشق ليها
من كتر التجربة والفك والنخربة بقيت افهم طشاش على قدى فى الالكترونيات
مجرد ما هتفك المشط من العربية
تفحصه بعينك الاول
او تفكه ان كان ليه غطا
ومن جوه
تعمل زى ما اتعلمنا من اساتذتنا على الانترنت
استخدم حواسك
الشم والبصروالادراك
ممكن تلاقى ترانسستور محروق
او مكبر او مقاومة فتحت
او شىء شايط او مش طبيعى
يبقى كده الكارت بايظ اكيد
الخطوة الثانية
اطلع على اى واحد بتاع الكترونيات
قله عايز اصلحه
هيقولك ده ايه قله دى حته عندى بتوصل كهرباء وفصلت
هيبصلك عليها
ان قدر يغيرلك الجزء التالف بالبديل
او بقطعة بديلة
سواء مقاومة او ترانسستور او مكثف او غيره
يبقى تمام
وجرب
ممكن يشتغل
وهو هيشتغل بس المهم يكون واحد فهم ويعرف البديل بتاع الايسى او الترانسستور
اشتغل كان بها وتدى الراجل ثلاثين جنيه او اربعين جنيه وشكرا
وتبقى عملت مصلحة ووفرت فلوس المشط الجديد
طيب لقيت الخطوة دى ما لهاش نتيجة
او استتقلت تروح لبتاع الكترونيات
يبقى قدامك خيارين
الاول
تطلع على بتاع الاستيراد
ومعاك المشط فى ايدك لما تدخل عليه
قله عايز زيه بالضبط
وسعر الاستيراد الحقيقى 90 جنيه - آخره 110 او 120
ضيف عليهم ضريبة طمع وجشع واستغلال التاجر
وضيف عليهم بقين رخامة ان ما فيش زيه وانه شايله وانه مش ناوى يبيعه
هتخلصه على 130 او 140
تديله الفلوس
وتقوله هرجعلك خلال ساعة واخذ فلوسى لوفيه حاجة
على التجربة
تطلع تركب وتجرب
ما اشتغلشى او ما عجبكشى ترجع فى خلال ساعة تديهوله وتاخد فلوسك
اما الجديد
فاعتقد صعب
وان وجد يبقى عشرة على عشرة
لانى زمان سألت الشيخ طارق شيخنا وشيخ الفيتاوية كلهم فى المنتدى
قالى انه متوافر استيراد
بعد ما انا دوخت عليه عندنا ما لقيتش جديد
المهم
لقيت جديد
هيبقى صينى ويسموه روسى او تركى
هيبقى تركى ويسموه ايطالى
هيبقى ايطالى ويسموه ألمانى
فانت ريح نفسك
وريح البياع
وخش عليه قله من الاول
عايز مشط صينى
علشان يعرف انك راجل غلبان زى حالاتنا
وما يفتحش معاك اسطوانة ده صينى وده تركى وده ايطالى
وطبعا انت عارف كله هلس وغش وفى الاخر كل صينى
هيوريك
قله هجربه قدامك
وفعلا
لازم تجربه الاول وانت قدامه او تاخد معاك كهربائى
هتقولى ليه
هقولك علشان الحوارات بتاعت البياعين
هيقولك انت بوظته
وهو اصلا بايظ
وياما قرينا فى المنتدى هنا عن حالات غش ونصب ولما ترجع للبياع يقولك
انا ما اعرفش ابويه
هتلاقى كذا موضوع
مرة طرمبة كهرباء
مرة كاربيراتير
والمقولة بتقول
السعيد من اتعظ بغيره
احنا بقى هنتعظ
اشتريه وجربه قبل ما تمشى
وما تصدقشى قصة الضمان
فى مصر بس
ما فيش حاجة اسمها ضمان
ممكن فى يوغسلافيا او الفاتيكان او ألمانيا او جزر هاواى
لكن فى مصر
اشترى وان طلع بايظ
يبقى قسمتك ونصيبك
ويا تعمل جنايه وتفتح دماغ الراجل يا اما تستعوض ربنا
وياما شفنا حوارات زى دى
المهم
لقيته غالى
تتصرف ازاى
تقلب عادة
اشترى اسبيراتير عادة وتريح دماغك من المشط خالص
والعادة شغال زى الفل
وخلاص اتعودنا عليه رغم انه مقرف بس احسن من المشط النادر
واتمنى اكون أفدتك
والله أعلم
التعديل الأخير تم بواسطة الايطالى الصغير ; 21-05-2012 الساعة 08:30 PM
|