رد: حكايتى مع السيارات-حكايه 10 سنوات
-44-
زميلى (ر) شخص طريف جدا وأيضا بخيل جدا!!
بعد سنوات من التفكير العميق والسؤال واللف والدوران على سيارة وبعد أن زهق طوب الارض وناكفهم 00
أشترى سيارة!!
شىء لا يصدقه عقل!
أخيرا أشترى سيارة
كان هذا بمثابة الحدث الاكبر فى محيط الزملاء وكيف لهذا أن يشترى سيارة وهو لم يشتر سروال وحذاء وقميص جديد منذ سنتين على الاقل!!
كيف هانت عليه فلوسه لهذا الحد؟
وعندما قابلته صدفه قال لى منشرحا:
-شفت عربيتى الجديدة
-لا
-تعالى يا راجل لما أفرجك عليها
وكانت الصدمة سيارة 128 موديل سبعينات متهالكة جدا
قلت فى براءة:
-أشتريتها بكام دى؟
-قول انت كده سعر لما أشوف أنا أتغلبت فيها ولا لأ
قلت مندفعا:
-آخرها بدل ف حمارة عرجة
وضحك قبل أن يقول:
-أنت عارف أنا حسبتها باخد توكتوك من البيت للشغل تلت مرات ف الاسبوع ب18 جنيه وزيهم مشاوير يبقى فى الشهر بتاع 150 جنيه وباقى المشاوير كعابى طبعا
يبقى العربية تصرف لها تلت قول أربع صفايح بنزين ب64 جنيه وعليهم 30 زيت وعشرين صيانه شهرية قول 120 جنية ف الشهر وأشتريت عليهم راحتى ودماغى وقضيت مصالحى وبعدين قيمة قدام الناس !!
قلت وأن يفترسنى الضيق:
-نظرية أقتصادية تمام
قال مستفزا:
-بس الواحد بعد سنة ممكن لو يبيعها يكسب كام؟
-تكسب كام؟
هيه كلها بكام عشان تكسب
قال منزعجا:
-يا نهار أسود يعنى الواحد ممكن يخسر
-ده الطبيعى
-والخسارة ممكن تعدى ميتين تلتميت جنية
قلت فى غيظ وحنق:
-ده يتوقف على اللى ح يفضل منها
-موش فاهم
قلت:
-يعنى هيه دلو قتى حالتها أربعة حافر 00لو بقوا تلاته تخسر
أدار صديقى السيارة وهويقول:
-بتتريق 00طب شوف اللى موش عجباك دى عليها مكنّة أيه وان
بتطير فى السكة
وعندما أدارها ترجرجت وزمجرت وكأن زلزلا قد حدث !!
زوّد لها بنزينا فخرجت الطلقات مدوّية من الشكمان وكأنه مدفع
كلاشينكوف!!
سار بها لتتمايل وتتمرجح كالكارو وتهبد وترزح كأنها ترسو على عجلات ومساعدين من الزلط وعفشة من الحجر الصوان!!
وطبعا بعد عدة أيام زادت السيارة قبحا ودمامة بعد الخبطات والكحتات التى أحدثها صاحبنا غشيم السواقة!!
وأذ به يقول:
-تصور يا أخى أمبارح وأنا بغسل العربية قدام البيت واحد جارى قال لى"ياراجل ربى فيها بط وفراخ أحسن لك"
ساعتها لو كان هناك شعرا فى رأسى لاقتلعته!!!!
تتبع
__________________
|