المشاركة الأصلية كتبت بواسطة marihan ahmed
لو سمحتم انا ان شاء الله هجيب عربيه مستعمله موديل 2010 أو 2011 فانا مش عارفه مين احسن واقوي شيفروليه لانوس و لوجان ؟
|
انا رايى تجيب دايو لانوس الموديل اللى لحد 2008 يعنى اللى هى عليها علامة دايو مش شيفرولية لان فى ناس ياما بيشتكوا من تقفيل الشيفرولية على عكس الدايو تقفيلها احسن واسمها كورى وخد بالك من الاتى:
1- لو هتشترى العربية شركة برة وجوة حاول تختار عربية ما يكونش فيها حكات او مرمات اطلاقا لان انت لو جبتها فيها حكة خفيفة او مرمة وحبيت ترشها سعرها هينزل كتير او ان انت ترح نفسك خالص وتعيش الواقع المصرى وتجيب عربية رشة برة نضافة لان كدة كدة مفيش عربية فى مصر الحبيبة مفيهاش حكات.
2- عاين العربية كويس وخد معاك حد ليه خبرة فى السيارات علشان يقيم حالتها كويس ويعرف يقدر تمنها
3- بعد ما تشترى العربية ان شاء الله اذا كان فيها رخصة سارية لاكتر من سنتين وانت مش هتركبها اكتر من كدة مشى بالتوكيل من غير ما تنقلها باسمك اوفرلك اما اذا كنت هتقنيها لفترة اطول من كدة وهتنقلها باسمك خد بالك من رسوم التسجيل فى الشهر العقارى واللى بتجاوز ال 1000 ج ورسوم الترخيص فى المرور واللى هتقارب برضه 1000 ج لو هترخصها 3 سنين لكن بالنسبة لرسوم الشهر العقارى ممكن تفاديها بانك بموجب التوكيل تكتب عقد بيع منك لنفسك وترفع دعوى صحة ونفاذ على عقد البيع ودى رسومها فى المحكمة 42.85 ج غير اتعاب المحامى اللى ممكن ياخد فيها لو مجاملك 100 ج او 200 ج ويبقى معاك حكم تروح ترخص بموجبه فى المرور مباشرة
ملحوظة : ان مش هقدر اتكلم عن اللوجان لانى مركبتهاش قبل كدة لكن انا معايا الدايو لانوس 2006 والحمد لله العربية جميلة وقطع غيارها رخيصة ومتوفرة وبتيجى وعاها رزقها
ومبروك مقدما
