السلام عليكم و رحمة الله و بركاتة
انا حبيت اطرح الموضوع ده عليكوا للنقاش و المقارنة بين العربيات الصينى الموجوده فى السوق المصرى زى (Brilliance-Spranza-Great Wall-shana beni-BYD-Livan-Xploision-Komodo-SMA-Geely)..تقريبا دى كل المركات الى اعرفها يمكن اكون ناسى ماركة تانية بس دول على ما اظن اشهر المركات الصينية فى مصر..يا ريت يا جماعة يكون نقاش هادئ و جميل من دون تحيز او عصبية لتعم الفائدة..و الى شجعنى انى اكتب الموضوع ان فى ناس كتير عاوزة تشترى عربية بس مترددة و محتارة بين العربيات الكتير دى و كل واحد على قد الفلوس الى معاه عاوز يجيب عربية تناسبة فا يا ريت ا جماعة كل واحد عندو عربية من العربيات السابق ذكرها يقولنا نوعها اية و موديل سنة كام و سعرها و متوسط تمن بيعها و كل المزايا و العيوب فيها عشان نعرف نوصل المعلومات صح للاخوة المحتاريين عشان يحسموا رأيهم و يتوكلوا على الله..
انا هبدء بنفسى
عربيتى BYD F3 موديل 2012..Gli
العربية حلوة و ممتازة متور 1600 متسوبيشى لنسر بومة سى سى..16 صباب..4 سلندر
الكامليات
1-فراملABS+EBD مانعة للأنزلاق
2-2وسادة هوائية (Air Bag) للسائق و الراكب الامامى
3-تكييف قوى بارد و ساخن
4-باور ستيرنج بس تقيل سنة بسيطة
5-فتح الشنطة و التنك من الداخل
6-اضواء امامية قوية و ممتازة
7-اضواء ضباب خلفية و امامية (على فكرة الى قدام ما بيكنوش ركبين لازم تركبهم فى التوكيل)
8-ادراج تخزين كثيرة و حامل اكواب (نفس صالون التويوتا كورولا بالضبط)
9-نظام مانع السرقة مع الارم
10-عجلات GT و جنوط المنيوم 15 (سبور)
11-عدادات LED مضيئة و عداد قياس مسافات Trip A-Trip B
-------------------------
العيوب
1-صوت ماتور عالى شوية بس مش مزعج و بيروح لما بتحط زيت حلو زى شيل و موبيل و احسن حاجة على قول ناس كتير زيت المانى اسمة ليوكو مولى مستورد.
2-الفتيس حلو بس فى عيب بسيط انو بيعض على خفيف فى الغيار التانى بس التوكيل بيضبط الكلام ده و ممكن تحط زيت فتيس جديد يضبط المشكلة دى نهائيا.
3-علو العربية عن الارض هو عيب و ميزة فى نفس الوقت يعنى العلو ده مناسب جدا للمطبات بل يعتبر ممتاز لاكن على السرعات العالية بعد ال150 مثلا بيبقى خطر(مين بيفكر يجيب اكتر من 120 اصلا)
4-بعض عيوب التقفيل المصرى الزبالة زى الشنطة و الببان بس دى بتتظبط فى التوكيل و بتروح مع الاستعمال.
انا اتكلمت عن عربيتى بكل حيادية و قلت كل الى انا حاسو فيها انما فى المجمل العربية جميلة جدا تحس انك راكب عربية يابنى او كورى بالضبط و العفشة مريحة فى المطباط و تكييف ممتاز و قوى و سحب العربية هايل مش ضعيف زى ما ناس بتقول لا يا عم دى عربية صينى تعبانة و مش عارف اية و لحد دلوقتى مفيهاش اى عيوب و انا لسة شاريها زيرو من شهر و نص كدة..فا ممكن يكون للاعضاء التانية خبرة اكتر منى فى العربية و هما بقا الى يقدروا يدو الحكم النهائى على العربية فا هما الملاك القدام ليها انما انا لسة جديد و كتبت كل حاجة انا حاسس بيها انها فى العربية سواء مميزات او عيوب مع ان العيوب تافهة و بسيطة جدا..
على اى حال مستنين كل واحد يكتب كلام زى كدة عن عربيتو عشان نتشارك الموضوع و نستفيد من تجارب بعض و خبرة بعض..
ارجو انى مكنش طولت زيادة عن اللزوم..
و السلام عليكم و رحمة الله و بركاتة