المشاركة الأصلية كتبت بواسطة vortec
أولا أتمني ان الأخ فادي مايطردنيش بعد الكلام ده
انت بتأول انك جربت العربية ذات الجير(الفتيس ) الجديد مسافة 20 كم\س لو انت بالفعل خبير وسايق عربيات فيها نفس نوع الجير ده أبل كدة تبأة فعلا العربية دي زبالة ,بالنسبة لي أنا متواضع وبألك اني بدأت أتعود علي الجير بعد أسبوع من شرائي للسيارة وعلي العكس من كل اللي اتفضلت وألته ما لاقيتش فيها أي حاجة من الكلام اللي ألته ده خالص صحيح لأني بروح كل يوم مشوار من الاسماعيلية للزقازيق عشان جامعتي رايح جاي يوميا علي سرعات تتجاوز ال 180كم\س بل تصل الي 200كم \س في معظم أجزاء الطريق وذلك لمدة عام كامل وليس لمدة 20 كم \س من القيادة بدون التدرب علي استخدام الجير الذي تفضلت ووصفته بالكارثي , الأهم اني لم ألحظ أي مشاكل في الموتور أو الجير وذلك مع العلم ان التكييف مابينطفيش مشكلة العربية الوحيدة انها بتسحب بنزين كتير مع السرعات العالية ومع الشد أدام الناس علي الطريق في وجود التكييف وأعتقد ان ده ما يبقاش مشكلة العربية دي تبقي مشكلتي أنا لأني من هواة السرعة , وبالنسبة للحاجة اللي وصفتها بالماتور الكسول وانه مش عصبي (ههههه) غريب جدا يعني ماتور عصبي أشتري بوجاتي ولا مازيراتي ولا أركب عربية فانتوم مش كورولا 1600 ولا شاهين 1400,بالنسبة لماتور بيوصل من 0 الي 100 كم\س في 10.2 ثانية بقوة 122حصان أتوقع انه يكون ممتاز بالنسبة لشخص متواضع زيي لا يطمح ان يمشي بسيارته أكتر من 200 كم\س . بالنسبة لموضوع الثبات والتوازن فهو أمر محسوم بحاجة بسيطة جدا اني باخد غرز بيها علي 180كم\س بدون أي مشاكل أو( تمايل غير محبب )زي ما حضرتك اتفضلت وألت وكذلك في الانعطافات مع أنظمة الفرامل اللي بتسهل عمليات الانعطاف بدون انزلاق أو تمايل علي العكس من الكورولا الخليجي التي لا تحتوي علي نظام abs حتي , بالنسبة للجير بوكس اللي حضرتك وصفته بالكارثي بنصحك تخلي حد فاهم كويس في الجير بتاع العربية دي يدربك عليه لأن ده المكتوب في دليل الجير بتاع العربية ان (يحق أي عميل أن يخرج في كورولا mmt برفقة أحد أفراد شركة تويوتا حتي يقوم بتدريبه علي كيفية استخدام الجير الجديد ) واما تعمل زي ما أنا عملت وتعد تتدرب عليها لمدة أسبوع عشان تقدر تشد بيها أدام الناس وتعرف امكانيتها الحقيقية وبالمناسبة بالنسبة للمازدا 3 اللي انت بتأول انها أفضل في الأداء من الكورولا شديت مع واحد صحبي علي طريق المطار بحيث ان أنا وصلت للدوران اللي في نهاية الطريق وهو لسة في بداية الطريق زي ما وعدته انه مش هيلحق يقرأ نمرة العربية بتاعتي. بس والنصيحة الأخيرة انك لازم تتسامح شوية مع التويوتا وأصحابها........وأعتذر ان كانت لغتي قاسية بعض الشئ بس دي وجهة نظر ولازم نحترم رأي الاخرين.
ENG.Mohamed Essam
|
لا يا سيدى نحن لا نطرد أحد هنا و لك كل الحرية فى التعبير عن رأيك كما تشاء.
و أهلا بك أخا لنا فى منتدى مصر موتورز.
بس مش فاهم هو كل واحد يقولى لازم تتعود و تتعلم على الفتيس؟ انا معايا رخصة قيادة صدقنى. و اللى بيسوق مانيوال يسوق اى حاجة يا بشمهندس و لا ايه؟ الاوتوماتيك بالنسبة لى لعبة, و بعدين هو المفروض اتعلم ايه بالضبط, الفتيس فيه وضعية اى و اى سبورت و مانيوال + و -, ايه اللى فاضل انى اتعلمه؟!!
على فكرة الفتيس اللى موجود فى اوبل و بى ام و فيات و الفاروميو و فولكس و اودى و و و هو من نفس النوع, مرسيدس هى الوحيدة التى تستخدم الأوتوماتيك.
بس ايه حكاية تدريب و الكلام الكبير ده؟ هى تويوتا فاكرة نفسها عملت اختراع لم يأتى احد بمثله؟ أحب ابشرك ان الاختراع الفضائى موجود فى معظم العربيات حاليا و من قبل ما تويوتا تفكر انها تصنع واحد مثله.
و لو كان الفتيس مفيهوش مشكلة و الناس هما اللى بهايم مش عارفين يستعملوه مكناش شفنا صفحة كاملة كل اسبوع فى ملحق السيارات تبشرنا أن الكورولا أصبحت متوفرة بفتيس مانيوال و أخر اوتوماتيك عادى و راسمينلك كل نوع فتيس, كأنه اعلان فتيس مش اعلان عربية.