هي حادثة جامده بس في السعوديه هنا وما ادراك جنون السرعه في الخليج
كنت راجع من المصيف انا وزمايلي فقررنا نرجع قبل الصلاه ونصلي في بلدنا وخلاص
فكنت ماشي علي الهاي واي 160 تقريبا معظم الطريق والعربيه تويوتا هاي لوكس
وكنت ماسك الحاره اللي في النص انا مبحبش امشي في الحاره الشمال لاني مبعديش حد
عشان مبحبش اطلع من الحاره كل شويه
فبمسك اللي في النص واللي ورايا يزمر براحته
يايهدي يا يعدي
وانا كمان مبتخطاش اللي قدامي
يعني بالبلدي بكون مروق شويه في السواقه ومبرخمش علي حد
يعني ماشي بسرعه بس لما الاقي حد ادامي لا بقلبله نور ولا بربكه يا يعديني يا استناه
واللي ورايا بحلقله يزمر براحته
جيت عند مكان في الطريق لقيت صف عربيات نقل ماسك اليمين وانا الصراحه بقلق لما اكون ماشي جنب عربيات نقل وكنت انا في النص وفيه عربيه ادامي
فقلت اطلع منها علي الشمال واشد سرعه شويه لحد ما اعدي كل صف العربيات النقل وابقي امسك النص تاني
فجاة وبدون اي مقدمات بممممممم
ايه اللي حصل بقي العجله الشمال اللي قدامي طرشقت
وانا طبعا مكنتش عارف انها العجله انا سمعت صوت بم وخلاص
مسكت فرامل من الخضه انا عارف انه غلط لكن ساعة القدر يعمي البصر
طبعا اول ما مسكت الفرامل فقدت التحكم بالعربية بالكاااااااامل
العربيه فضلت تلف بينا ودخلت في الحاجز اللي في نص الطريق
والعربيه طبعا ادمرت
ودخلنا في الحاجز وردينا بعرض الطريق
وحمدت ربنا ان محدش من اللي معايا حصلتله اصابات كبيره
والاهم اننا مدخلناش في عربيه تانيه
وحتي صف النقل كنت سبقته بفتره كافيه بحيث يبقي عنده رد فعل يهدي
بس كل ده كوم واللي حقوله كوم تاني
المشكله مش في الحادثه
المشكله ان العربيه مكنتش بتاعتي
وكان واحد زميلي واخدها من وري جوز اخته ومعهوش رخصه وانا اللي كنت سايق
ومكنش قايله ان هو مسافر بالعربيه
وحتي العربيه مكنش فيها رخصه
تخيل تسيب مفتاح عربيتك مع واحد
وبعد يومين تلاته يرجعهولك برده
بس من غير العربيه
ههههههههه
