[the mask]

السلام عليكم ورحمه الله وبركاته

الاستاذ الكريم محمد

صراحة اود ان أبدى مدى تقديرى وأحترامى فى أول مشاركه لى فى هذا الموقع لسعادتك على مجهودك وأسلوبك وردودك المتميزة جدا وهذه كلمة حق واجبه على كل من يرى مجهودك بالقسم وردك الراقى على الاعضاء

سؤال بخصوص سياره ابيزا موديل 2000 موتور 1000CC

أنا أشتريت السيارة منذ سنتين وكانت عاملة 66 ألف كيلو والان هى عاملة 98 ألف كيلو

والسيارة فعلا بتتحمل كتير جدا وقوية جدا جدا لكن اللى شوفته منها الاتى

والسيارة الصراحة أنا صرفت عليها حتى الان فى الميكانيكا عشرة الاف جنيه ولم أصل للمستوى اللى كانت عليه يوم ماأشتريتها

والميكانيكى اللى بأتعامل معاه اسمه سيد أبيزا فى جسر السويس جانب بنزينة التعاون

الاول غيرت اسطوانة وديسك

وغيرت علبة باور وعلبه دريكسيون

ومرة دخلها على الكمبيوتر قالى حساس المنافول مدى قراءه عالية وعاوز يتغير بس مالوش لازمة تغيره مادام العربية ماشية كويس

وغيرت بلى العجل 3 مرات لانه كل مرة يبوظ ويعمل صوت واخر مرة ركبت استيراد وكان ثمنه 250 جنيه

وفى احد المرات سوكت المفتاح علق ورحت لواحد كهربائى ربنا يسامحه فك الطاره وخرب الاير باج ورحت التوكيل وطلعوا عينى لما صلحوا المفتاح لكن الايرباج باظت خلاص

وبعد كدا ثلاجه التكيف خربت واشتريت ثلاجه جديدة وطلع عينى لما غيرتها ولقيت حد بيفهم يغيرها وكلفتنى 1500 جنيه

وبعد كدا العربيه سحبها قل فرحت للميكانيكى اللى فى جسر السويس وقالى دى بوجيهات

المهم فضلت اروحله لمدة سنه وكل شوية يغير البوجيهات وشفت ايام مايعلم بيها الا الله

اخر حاجة قالى لازم نفتح الموتور لانه بيجيب زيت على البوجيهات

وبعد مافتحه قالى دا وش السليندر وغير الجلب بتاعته عند خراط وركبها

بعدها بشهر نفس الحكاية وكمان دخانه من الشكمان

رحتله فحال الموتور والى دى محتاجه طقم بساتم وجابلى طقم جديد

والمصنعية كانت 1400 جنيه فى الموتور فقط

وطبعا غيرت سير الكاتينه وفلاتر الهواء و مقصين اماميين

وغيرت بوجيهات اكتر من 30 مرة

وفجأء بقيت أسمع صوت وانا ماشى فعرفت ان المشكلة فى سقف العربية وقالولى لازم تروح لواحد يظبط ليك السقف وحتى الان لم أعثر على حد يعمله

وحاليا بأسمع صوت عالى من الجانب الشمال للعربية والميكانيكى قالى ده الفتيس ولكن ده صوت عادى فى العربيات دى وحاتسمعه بس لما تدور العربيه وتكون بارده وبعد كدا حايختفى

اخر حاجة الان العربيه ماشية معقول لكن التكييف ضعيف والسحب ساعات كتير يضعف فجأة واوقات العربية تهتز جدا وانا ماشى لمدة ثوانى وترجع تتظبط تانى لوحدها ومش عارف ليه

وكنت فى زياره لواحد صاحبى فى اسكندرية ورحت عند الميكانيكى بتاعه واسمه هريسا وهو ميكانيكى جولف وسيات فى اسكندرية وشاف الموتور وقالى البوجيهات بتجيب مياه ولازم الموتور يتغير

فرجعت للميكانيكى بتاعى فى مصر سيد ابيزا وقلتله هو المكنة بتاعتى عاوزه تتغير قالى مادام الموتور قارى اربعه يبقى مافيش مشاكل ولكن لو سقطنا موتور 1400 يبقى أحسن وحايكلفك 8000 الاف جنيه

والله انا بأستغيث بيك بجد لأنى اتخنقت جدا جدا وعاوزك تقولى اعمل ايه عشان احل مشاكل العربية دى وهل انت شايف ابيعها احسن على حالتها دى ولا اصرف تانى وممكن ترجع تانى افضل لأنى بجد تعبت جدا وصرفت كتير اوى عليها من يوم مااشتريتها وبقيت بأكلم نفسى

وحتى الان نفسى الاقى حد يصلح لى الصوت اللى فى سقف العربية لأن رحت لواحد سروجى وفك السقف وماعرفش يصلحه

والموتور هل اغيره ولا اسيه والتكييف ممكن يتحسن إزاى

وأنا فى النهاية بأعتذر لك بشدة على الاطالة لكن انا اللى حصلى واللى شوفته اكثر بكثير ومن كثرة اللى شفته من العربية مش عارف اعمل ايه هل ابيعها واسعوض ربنا فى اللى صرفته عليها ولا استحملها وأكمل معاها

ولو انت شايف انى اكمل مع العربية دى تنصحنى اغير فيها أيه وأروح لمين والتكلفة كام

ارجو الافادة أستاذى الغالى ولك من كل التقدير

تحياتى
د/ امير المصرى
مدرس مساعد بكلية الطب - جامعة القاهرة