فيات 132 بتاعت الحج كنت بنزل اسخنها الصبح وانا رايح المدرسة وبعد كدة جاب لانوس موديل 2000 عالزيرو كنت بسرقها وعلمت نفسى السواقة من غير ما يعرف
ولما دخلت الكلية جابولى 128 موديل 87 عمرى ما حنساها كنت ايامها لسة مطلعتش رخصة وكانت مركونة تحت البيت اخدت واحد صحبى وخرجنا بيها وكنت اول مرة اسوقها وحظى الزفت جدى شفنى واخد المفتاح لحد ما اطلع الرخصة و اول لما كملت ال18 سنة روحت طلعت الرخصةو نزلت بيها بليل و ولعت بيا
اة تخيلو اول نزولة بالعربية ومعايا صحابى بقى ولسة حنمشى لاقيت الدخان طالع من الكبوت
بعدها عالطول اتباعت
وجبت عربية عمى هوندا اكورد موديل 80 ودى تعتبر اول عربية مارست بيها السواقة بجد وكانت فى الاول مش عجبانى عشان شكلها القديم وحجمها المبالغ فية كأنى راكب سفينة
وكانت اصيلة لازم تعطل فى اخر يوم فى الامتحانات بس ليها الفضل عليا انها علمتنى الميكانيكا دانا دخلت قسم ميكانيكا مخصوص عشان اعرف اصلحها بنفسى ومروحش لميكانيكية تانى و فى البكالوريوس جبت فيرنا 2010 عالزيرو
حمالة اسية والله
