سيفيا ام اكسنت ؟
السلام عليكم و رحمة الله و بركاتة
تحياتي لكل الاخوة الاعزاء اعضاء و زوار المنتدى
طبعا من العنوان معروف انا هسأل على ايه.لكن انا عارف الاجابة نوعا ما.اكيد طبعا السيفيا احسن.اكبر.افضل.اشيك.اوسع. ......الخ
لكن في نقط كتير من الناس لا تنتبه اليها..لان بعض الناس تتشد ناحية عربية معينة و تعشش في دماغها و هي ممكن تستحق و بعد كده تندم على قرار الشراء. لتوضيح المثال...معظم شرائح مالكي السيارات من الطبقة المتوسطة..يعني دكاترة او زي حالاتي مهندسين..و ظروف الحياة بكل التزامتها لا تخفى على احد..و ده يمكن سبب انتشار انواع زي الفيرنا و اللانوس دون اي انواع تانية..و لو جيت سألت اي حد من ملاك النوعين دول مثلا هيجاوب يقوللك ..انا معايا سيولة اشتري BMW مستعمل مثلا..بس بعد كده هعمل ايه لما حاجة فيها تبوظ..هكع دم قلبي في تمن التصليح و مصنعية اللي هيصلح و حاجات من كده..وانا محتاج فلوس عشان اشتري شقة اكبر مثلا او ادخلهم في تجارة و كده يعني..وهو ده بالظبط محور سؤالي
*السيفيا ممتازة..لكن هل قطع غيارها متوفرة و رخيصة بسعر قريب من اسعار الاكسنت اللي الناس كلها عارفاها ولا ايه..
*هل الميكانيكا بتاعتها و الكهرباء و العفشة و الكلام ده سهل اني الاقي حد كويس يعملهم زى ما طوب الارض بيصلح الهيونداي عموما..مع العلم ان السيفيا فيها حساسات كتيرة و فيها شغل الكترونيات كتير يعني الموضوع معقد ولا الدنيا كويسة فيها و بسيطه زي بساطة الاكسنت..
*قطع الغيار الصلبة-زي مانا سميتها-اللي هى اجزاء الصاج و الفوانيس و الكلام ده..متوفرة و سعرها قريب من سعر الاكسنت ولا ايه النظام..
*اخر حاجة.سهولة اعادة البيع..هعرف ابيع بعد كم سنة ركوب ولا هحتاس بيها..والنقطة ده مهمة جدا لان بصراحة في جهل شديد لدى معظم شرائح مالكي و تجار السيارات..يعني ازاي ماركات زي الهوندا..الرينو..سيتروين. .سيات تبقى صعبة في اعادة البيع..في حين موديلات زي الفيرنا و اللانوس هوا في البيع..بجد بستغرب..
انا عارف اني طولت عليك..بس والله المبادئ اللي انا حددتها في الاسئلة اللي فوق مهمة لاي حد بيقارن بين انواع مختلفة حتي لو زيرو عشان يبقى بيختار صح...
مستنى مشاركاتكم و ردودكم
السلام عليكم
اخوكم احمد
|