مش مهم الخبطة فى رأييى (تعيش وتتخبط ههههههههه) المهم انك تتعلم وبما انك جديد يبقى (هاعقم) على نقطتين
1- بما ان حضرتك جديد فى السواقة يبقى لمفروض تلزم اليمين او الوسط لان الشمال ده المفروض انه للسريع وحضرتك لسه مبتدىء فا بلاش تسرع لغاية ماتتمكن تمام وربنا يكفيك شر السرعة وخصوصا ان الشمال معظمة نصف نقل وبيبقوا طايرين مش ماشيين يعنى لو حد جه وراك سريع هايديك كلاكس ويقلب نور عشان عايز يعدى من الشمال وده حقة لانه اسرع منك فا ممكن تيجى ترمى يمين شويه تخبط فى اللى جاى من يمينك لا قدر الله
وفى حاجه مهمة حضرتك قولتها:
فى الحاره اللى جمبيا وانا مش واخد بالها منى فطلعتلى فجاه
طبعا المفروض ان حضرتك تاخد بالك (وخصوصا انك جديد) عشان كده انت اتفاجئت
2- ودى بقى اهم من رقم واحد اعرفها نظريا ومع الوقت هاتتقنها: اتعلم ماتستغناش عن مرايات العربية يمين وشمال وصالون والمح فيهم جوانب العربية وخلفها من وقت للتانى عشان تعرف انت فين من الطريق واهتم ثم
اهتم ثم
اهتم بالاشارات لانها ببساطة عبارة عن (نية السواق) يعنى الاشارات بتقول انت ناوى علي ايه وبتفكر فيه عشان اللى جنبك واللى وراك يعرفوا اتجاهاتك فايعملوا حسابهم عليها امشى شمال (ولو انى ما ارجحش لك دلوقتى) زى مانت عايز وقبل U-turn خد يمين شوية وخليك فى النص عشان اللى جاى من شمالك اكيد هايلف او خليك شمال بس ادى اشارة ع اليمين بكده اللى وراك واللى جنبك هايعرف انك مكمل طوالى فاهايستنى لما تجاوز الفتحة وبعدين يلف هو براحته
واللى حصل ان حضرتك ماشى مش مدى اشارة يمين اللى بتقول انك مكمل فا بالتالى السواق اللى على يمينك (ظن) انك هاتلف من الـ U-turn ومش مدى خوانه على اعتبار انك هاتلف معاه وبالتالى لف هو وحضرتك لأ ومكان الخبطة بيوضح طبعا ان حضرتك اللى غلطان يعنى انت اللى دخلت فيه
االحمد لله ان الخبطة بسيطة واعذرنى لانى مش عارف تكلفة التصليح واعذرنى برضه على الاطاله لكن حبيت انقل لك تجربتى فى القيادة اول ماتعلمت وحبيت اقولك اتعلمت ازاى
ربنا يستر طريقك وحاول تطبق قاعدة القيادة: فن-ذوق- خلاق ودى الحسنة الوحيدة اللى طلعت من ادارة المرور بمصر واهتم قوى بفن ومتعة القيادة الصح طبعا
