[MOSTAFA SALLAM]

اسلوب رائع و مشوق للغاية و اهنيك عليه .
بس بالله عليك بلاش البلونيز لأن انت كدة دوست على الجرح و العربية دى قضيت فيها احلى ايام حياتى و قعدت معانا 12 سنة و بابا كان جيبها و انا فى اولى حضانة
و كان كل ميجى بيبيعها افضل اعيطله و اقوله لأ و مرة و انا فى تانية ابتدائى كان بيعمل عمرة كاملة للعربية و قولتله انا العربية وحشتنى و عاوز اروح اشوفها فأخدنى معاه و لما روحت و شوفتها كانت الصدمة انى الاقى العربية الصالون بتعها مفكوك و الزجاج و الفوانيس و كل حاجة و متمعجنة من برة
و طبعا انا لما شوفت كدة مقدرتش امسك نفسى و اعد اعيط و اقوله انا عاوز العربية و هبات فيها و المهم روحنى بالعافية .
و جينا فى 2006 و كان بابا خلاص مقرر على التغير و هيغير يعنى هيغير و مش فارقة معاه اعيط ولا لأ و روحنا اتفرجنا على عربية تيريوس 99 و كانت عجبا بابا جامد بصراحة .
و لما كنا رايحين نتفرج عليها قعدت ادعى ربنا و اقول يا رب ميشتريها و زوبة تفضل معانا و لما قابلنا الراجل و اتفرجنا على العربية قعدت اقوله يا بابا دى فيها فانوس محروق قالى مش مشكلة
يا بابا دى مخبوطة فى المكان الفلانى يقولى برضه مش مشكلة كلها حاجات بسيطة .
يا بابا دى ملهاش قطع غيار يقولى لأ موجودة .
يا بابا دى بتقلب من اى ملف يقولى انا مش بحب الجرى .
و اخر مزهقت قولتله على فكرة العربية دى رشة دواخل قالى عرفت منين قولتلوا هى راشة و خلاص
و الحمد لله ان ربنا مكتبش نصيب فيها .
و بعد كدة قرر انه يجيب زيرو و قرر على هيونداى اكسنت و كانت ناقلة جامدة و كمان زيرو المهم قعدت معانا 6 شهور و طبعا كنت بنزل ادورها و احركها كدة و اتعلمت فيها ازاى اشيل رجلى من على الدبرياج و اول عربية اغسلها بمية و صابون لأن بابا كان رافض ان اغسل زوبة خالص و كان بيغسلها و يشحمها فى البنزينة و مكنش حتى بيرضى يخلينى ادورها لأنها كانت تقيلة شوية فى الدوارة .
و طبعا الأكسنت ممشتش معانا لأنها واطية اوى و احنا ساكنين فى العجمى لو حد يعرفها يعنى
و نقرت و الفوانيس عرقت و بعناها و ساعتها كنا شارينا ب 55000 جنيه هو المفروض 54000 بس غبور ابن ( .....................) اثناء الأستلام قال العربية غليت 1000 جنيه .
و لما جينا نبيعها كان الأكسنت خلاص وقف انتاجها و سعرها كان وصل ل 58000 و فى ناس كانت بتبيعها ب 60 و ب 62 الف كمان المهم احنا بعناها ب 51000 جنيه نعتبر مخسرناش فيها كتير يعنى .
و بعد كدة قولنا عاوزين عربية عالية و كان بابا حابب التيريوس بس مكنش لسة نزل منها جديد و لحسن الحظ نزل عربية اسمه زوتى اكسبلوجن المهم اشتريناها و كانت اول عربية تنزل اسكندرية والله كانت من ضمن اول دفعة ( 7 عربيات فقط )
المهم كانت ناقلة جامدة اوى و كاسيت C.D و فلاشة و ميمورى و ازاز كهرباء و سنتر و غيره و كمان عربية 2*4 و اتعلمت عليها السواقة و انا فى 2 اعدادى و قعدت معانا 4.5 سنوات من غير منغيرلها مسمار دة حتى البوجيهات مغيرنهاش والله ولا حتى فلتر الهواء و بعناها من 10 شهور و خلال الفترة دى ( اللى هيا 4.5 سنوات ) و بعد متعلمت السواقة كنت بخدها سرقة كنت بقوله نازل اغسلها و انزل الف بيها و اعمل سباقات مع اصحابى و عيشة والله
جه بعد كدة واحد صاحبى اشترى لوجان و لما ركبتها عجبتنى والله و اكتر حاجة عجبتنى فيها العفشة الناعمة و التكيف و لما جينا نغير بابا كان عاوز يطلع على اوبترا فول ابشن و راح و اتفرج عليها و انا كنت رافض الأوبترا اساسا و بينى بين نفسى قولت: ( على جستى الأوبتر ا ) و قعدت اغويه فى اللوجان و يقولى يابنى الرينو عربية معقدة و قطع غيارها نااااااااااار و لما نيجى نبيعها مش هتجبلنا فلوس و كان مصمم على الأوبترا و وحنا عند الطارق اسماعيل - كارفور و بنتكلم على الأبترا قولت للمندوب اللى هناك ممكن اتفرج على اللوجان قالى برتك و فتحلنا العربية و اتفرجنا و قعدت اقنع بابا بيها و كمان المندوب قعد يقوله فيها شعر
فقالى يا مصطفى احنا كدة هندخل على عربية فى نفس الفئة يعنى معملناش حاجة و زى ميكون المندوب كان منتظر الكلمة دى و قاله العربية دى معفية من الجمارك و المفروض انها مخصوم من تمنها 24000 جنيه و لو كانت نزلت بجمارك مكنتش قلت عن 85000 جنيه !!!!
و فى النهـــــــــــــــــــــ ــاية بابا قرر يجيب اللوجان بعد يوم واحد فقط .
و روحنا رخصنا و العربية تحفة ما شاء الله .
بس يعيبها ان سحبها و تجميعها بطىء اوى بصراحة اسوأ عربية ركبتها فى السحب و التجميع و كمان ابعادها مش سهلة و اتخبطت منى فى العتبة من الخلف و البطيخة اتحكت 3 مرات و كدة يعنى بس دلوقتى اتعودت عليها و الحمد لله ان ربنا وفقنا فى اختيارنا و عاشت لوجى حرة مستقلة
و اقعدوا بالعافية